Oomwenyo dhaaniilonga mekulo lyOshipangelo sha Shakati dhili moshiponga

OOMWENYO dhaaniilonga mekulo lyOshipangelo shEpangelo shaShakati odhi li moshiponga, omolwa oombiga dha kulupa nayi dhoka hadhi topa ethimbo tadhi telekelwa.

Shika osha eta aaniilonga yamwe yapwe nayi komalutu kiitelekomwa iipyu, mbyoka hayi nuka moombinga sho tadhi topa.
Aaniilonga mekulo lyOshipangelo shika oye li nee ya geela aakuluntu yawo miilonga, molwashoka aniwa ihaya ulike eitulomo monkalonawa yaaniilonga ngele taye ya lopotele iiponga yomatopo goombiga.
Iha ye a yatale uunene wiiponga komalutu gaaniilonga. Oya nyenyeta woo kutya aaniilonga mboka yapya komalutu miipongambika ihaa pewa tuu nando oshimaliwa okufuta omauwehame gawo.
‘Ohela (Etiyali) manga twi ipyakidhila nokuteleka, ombiga ndjoka tayi telekelwa onyama oya topa. Onyama oyu umbwa mo komutopo noya napakana nokombitha ayihe. Elago enene inapu monika oshiponga. Ngashingeyi aaniilonga oya tila mo mekulo unene tuu sho tatu longitha oombiga dha fula dhoka tadhi ulike kutya kadhina siku inadhi topa. Otwa tila, pamwe etopo lya landulako otal i ke tu ikilamo melugo muka.Tse otwa tila,
oomwenyo dhetu odhi li mosshiponga,’ aaniilonga tay popo ngaaka.
Otata ti kutya omutopelo ohaga kala omunene nayi gwa fa gwomboma na omatopo ngaka ngashiingeyi oga thika piikando pomilongo mbali lwaampoka okuza oomvula dha zako, shoka she eta mpaka oombiga dhi kale dha thilwa poombululu.
Oya tumbula kutya oshimoko tashi zi moopaipi dhaza kooboiler otazi udha =omeya moombiga moka hamu telekelwa iikulya. Oya holola uumbanda shina sha nuukalinawa wiikulya kaanuuvu ngele omeya ngaka oga lumbakana naangoka taga telekithwa.
‘Otu na uumbanda pamwe omeya ngaka otaga eta uupyakadhi miikulya. Otwa hala omukonaakoni guukalinawa a konakone oshinima shika,’ taya indile ngaaka. Aaniilonga oyi indile wo Epangelo li pingenepo oombiga dhika dha kulupa noombiga oompe na ekulo lyOshipangelo nali
tungululwe nokwoopalekwa molwaashoka olupanda olina omalambo niipeleki ohayi piti omeya ethimbo lyomvula, tashi etta eekulo li kale lyu udha omeya.
Oya hokolola kutya aaniilonga oya kala nok punduka noku patekena pokati kiiteenda mbyoka ya siikila omikanka dhoku matuka omeya meni lyokombitha.
Aaniilonga mboka ya monena iiponga mekulo oya nyenyeta kutya omaindilo gawo ihaga longwa mo meendelelo. Ngele ye ga fala kOmbelewa yaaniilonga mOshipangelo, ihaa pewa omayamukulo gawo nziya.
Aluhe ohaya lombwelwa kutya oga tumwa kOvenduka ashike iha kuzi sha. Oya indile opo omukuluntu gwoshipangelo a ningepo sha.
Kepulo ngele okwa oku na ontseyo yaashoka tashi popiwa kaaniilonga mbaka,Omukuluntu gwEkulo Angelina Kamwangha okwa koleke omapopyo ngaka, ihe okwa ti omapulo mu shika naga ukithwe kOmunambelewa Omukondololi Ben Iifugula, oye a gandje okomenda mu shika.
Inatu mona ekwatathano naIifugula osho ka oku li mefudho omanga Omukuluntu gwoshipangelo Omundohotola Shannon Kakungulu, a ti kutya omapulo mu shika naga ukithwe ku
Amushanga gUuministeli wUundjolowele nOnkalathano.
Omukuluntu mUuministeli gwUuhaku mOpashitopolwa shaShana Omundohotola Naftali Hamata, ina vula okutya ko sha oshoka okuli mefudho na ota galukile mefudho oshiwike tashi ya