Oominista dhimwe mu Tunisia dha thiga po Epangelo

TUNIS – Onkundana okuzilial ku Tunis sha Tunisia, otayi kutya Oominista dhi li ne moshilongo shika odha zi mo mEpangelo epe lyopaukume, ndyoka lya totwa mu Tunisia omasiku ngaka nelalakano okuhulithapo omakuyunguto ngoka ge li moshilongo.

Oominista adhihe dhika ne odha li aatondi yOmupresidende gwa Tunisia, Zine El Ben Alli, ngoka a li a thigi po oshilongo shika oshiwike sha zi ko.Nonande ongaaka, inaku monika naanaa natango uuyelele ngele embendango lyOominista dhika otasli ka piyaganeka Epangelo lyopaukumwe, moka mu na Oominista okuudha dhi li 40 nosho wo Oominista dhOpevi.Omakuyunguto oga tameke mu Tunisia lwopethimbo mpoka pwa li pwa tseyithwa embendango lyOominista ndhika. Aapolisi oya li ya dhenge nokuthanga omuhololimadhiladhilo gumwe sigo a ongotele pevi omanga Aapolisi yalwe ya li yu umbu oohasa, nelalakano okuhalakanitha ongundu yaahololimadhiladhilo omathele. Omakuyunguto mu Tunisia, ngoka ngashiingeyi ga kwata omwedhu, oga shunitha wo omatalelopo koshilongo shika molweshoka aatalelipo oyendji mboka ya li mo oya kuthwa mo omanga mboka ya li ya hala okuya momatalelopo hoka, ya kansela omatalelopo gawo.Ominista yOpevi yIiyenditho, Anouar Ben Guddour okwa lombwele oshitumikundaneki sha Associated Press (AP) kutya ye Housiine Dimassi noshowo Ominista kayi na oshipundi, Abdeljeli Bedoui oya mbendanga.Oominista adhihe ndhika ndatu odhi li iilyo yehangano enene lyaaniilonga mu Tunisia lya UGTT, ndyoka kali shi opaati ihe ehangano hali longo lya fa ongundu onwethimo na olya kwata oyendji moshilongo.Iilyo yehanano ndika oya li nee ya ningi edhololomadhiladhilo pondingandinga ya Tunisia mEtiyali, tali indili ku inge ekanka lyopashigwana, ku ningwe omalundululo mEkotampango nosho eeguluo mondhilongo lyaawiliki yomahangano gaaniilonga ayehe. Ominista yUuhaku Mustapha Ben Jaafar gwongundu yompilamena yo FDLT, naye okwa mbendanga, osho shopaati ndjika Hedi Raddaoui, osho a lombwele AP. – Nampa