Oomeme tava nyamifa itava yambididwa meenhele doilonga

Omakonakono okwa holola kutya oomeme tava nyamifa ihava yambididwa meenhele doilonga.

Oidjemo yehangano ledina Nutrition and Food Security Alliance of Namibia (Nafsan) oyo kwa li ya nyanyangidwa Etitatu oya popya kutya omahangano neenhele doilonga moNamibia keeli pamukalo oo wokukwatela mo oomeme ovo tava nyamifa.

“Okunyamifila moilonga natango oku li oupyakadi wakula, shaashi eepelesenda 95 domahangano e li 46 oo kwa li a ningilwa omakonakono kae na eenhele donomenawina dokunyamifila, nande eshi oshi li sha fimana moule womafiku e li 1 000 opetameko lokaana,” Omukulunhuwiliki woNafsan Ben Schernick osho a ti ngaho Etivali.

“Mokati komahangano aeshe 46 a kufa ombinga, ehangano ashike ledina Ohlthaver & List Group, Capricorn Group noBank Windhoek e na eenhele dokunyamifila koilonga,” Oidjemo yomakonakono osho ya ti ngaho.

Omwaalu ou owa kwatela mo omalelo eedoolopa, eeministili neembelewa depangelo, oiputudilo, oipangelo, eenhele domakwatafano opamhepo, eemina, omahangano oimaliwa, omahangano eameno, omahangano oikundaneki noikandjo ikwao.

OIPUNDI YOPAMUFIKA

Momahangano aeshe atatu, eenhele dokunyamifila odi na onhele yopaumwe ye likalekelwa, oshipundi shiwa nokila yokutalaleka, oidjemo yomakonakono osho ya ulika ngaho.

“Momahangano aa atatu, omu na nokombifa i na omeva,” Oidjemo osho ya ulika ngaho.

Schernick okwa denga omufindo kefimanao lokunyamifa okudja pedalo fiyo opeedula mbali.

Okwa ti oshinima eshi kashi uditike ko nawa moNamibia nosho yo kovaleli ovo ve li mepangelo nokiikondo yopaumwene.

“Eli olo etomeno tu na ashike natango eenhele dishona nomatungo ehe na eenhele da manguluka opo ovakainhu va twikile nokunyamifa,” Osho a ti ngaho.

Eenhele doloinga moNamibia inadi tambula ko nawa ovakainhu ovo tava nyamifa ndee kashi shi ashike ounona nooina ovo tava mono oixuna, osho a ti ngaho.

“Oshi na yoo owii konghalo yeliko letu moshilongo. Omakonakono kombinga yondjala okwa ulika kutya eepelesenda 5 deliko loshilongo ohandi ka nifilwa ashike momikifi odo hadi imbi okaana ka kule nawa,” Schernick osho a ti ngaho.

LUNDULULENI OKATENDO KOILONGA

Omupedu minista woilonga, omakwatafano oikwafaabulika nosho yo okutota eemhito doilonga Hafeni Ndemula okwa shiivifa momutumba wopashiwana Etitatu kutya omalundululo okatendo koilonga otaa ka kundafanwa opo ovakainhu tava nyamifa va dule okukala ve na eenhele dokunyamifila moilonga.

Okwa ti omalunduluko otaa ka kwatela mo omauwa e lixwa po oomeme opo va mono ounona nosho yoo eameno lakola kovayandji voilonga.

Okwa twa omukumo opo ku yambulwe po eenhele dokunyamifila nosho yo oufudo koilonga.

Omukwateli komesho womutumba wopashiwana Peter Katjavivi okwa lombwela omutumba wopashiwana Etitatu kutya eepaliamente dimwe mounyuni odi na eenhele dokunyamifila.

Omutotiveta Tobie Aupindi Etitatu okwa ti ovakainhu onghee ngaa tava twikile nokutaalela omaudjuu manga inava ya mokafudo kokukamona okaana nokonima ngee va di mo.

“Ohatu dulu lela okuninga po sha shihapu shiwa. Kapu na eenduda omo tava dulu okulongela … inava pewa eameno lasha,” Osho a ti ngaho.

Aupundi okwa ti omahangano aNamibia naa ninge po sha kombinga yokuyambidida oomeme ovo opo va mono ounona neenhele dokunyamifila nosho yo okukufa oufudo omanga tava twikile okumona omauwa avo aeshe.

Omupelesidente wongudu yoLandless People’s Movement (LPM) Bernadus Swartbooi Etitatu okwa pula nghee omauwa ovanhu ovo opo va mono ounona taa ka vatela ovo va dja meengudu doiyemo i li pedu.

“Eshi otashi ka longa ashike kovakainhu ovo ve na oiyemo yopokati. Oshinima eshi otashi ka longa ngahelipi novanailonga vomomaumbo? Otashi ka longa ngahelipi nomunhu ha nwefa omatuwa omahooli?”

Minista womauyelele nomakwatafano opaungoba Emma Theofelus, manga ta kufa ombinga meenghundafana, okwa ti elunduluko ola kwatela mo okunyamifa nosho yo ovadali va dule okuyandja omashini okonulo kounona vavo.

“Osho sha fimana unene, shaashi ovakwaita volutu vounona otava dulu okunghonopala nawa notava dulu okulwifa omikifi nawa shaashi kapu nande oshinima tashi dulu okukulika okaana nawa shi dulife omashini okonulo,” Osho a ti ngaho.

OVETA OTAI TI NGAHELIPI?

Omunawino woinima ya pamba oilonga Sydwill Scholtz Etitatu okwa lombwela oThe Namibian kutya oveta yoshilongo itai dengele kutya ovayandji voilonga nava yandje eenhele dokunyamifila meenhele doilonga.

“Oshinima ashike osho oveta tai pula okuyandja omhito opo omunhu a ye mokafudu a ka mone okaana ndee ta twikile okumona omauwa aye.

Oomeme ove na okutula po efimbo lokuyandja omashini omondooxa kounona vavo ile va kwashilipaleke kutya omashini okonulo awana okwa fiwa keumbo, ngee tava i koilonga,” Scholtz osho a ti ngaho.

Oshinima osho tashi ningwa kounyuni shovanailonga tava yandje eenhele dokunyamifila peenhe doilonga opo natango tashi ya moNamibia, ndee ovanailonga vashona ovo ve na ashike eenhele odo, osho a weda po.

“Nande okulela nokunyamifa okwa fimana, oupyakadi ou li apa kutya ha keshe umwe ta dulu okweetelwa okaana kaye luvali mefiku ke u ye ka nyame koilonga. Onghee nee ove na okumona oshinima eshi shidjuu nokuningwa, nande nee eshi otashi dulu okupitikwa kovayandji voilonga.”