Oombudhi tadhi longo oonomola dhootekisa dhiifundja

OOMBUDHI odha tameka oku hambula oonomola dhiifundja dhotekisa sho ethimbo lyokutulako omandhindhiliko ngaka kiiyenditho yokututa aantu konyala lya hulu pehulilo lyomwedhi gwa yi.(31 Kotoba 2009).

Okwiishangitha kiiyenditho mbika yokututa aantu okwa li kwa thanekwa ta ku hulile mo 30 ga Kotoba 2009.Aawiliki yoshilando mboka oyo ye na oshinakugwanithwa shoku gandja oonomola kiiyenditho yokufala aantu oye li konima okushininga, moonkambadhala dhawo okuvudhamo iiyenditho mbyoka ta yi longo pondje yompango.Omanga ewiliko lyoshilando ta li ende ngaaka, oombudhi dhimwe odha tameka nale okulonga oonomola dhiifundja nokudhitula kiiyenditho yadho opo dhi vule okutsikila nokulonga iilonga yomuyonena.Ehangano Lyuumbesa Nuutekisa lya Namibia olya tseyitha metine kutya, osheenditho shimwe sha fa shoka shokufala aantu sha tulwa onomola osha longithilwe meyako lya ningwa pomatungo gepangelo oshiwike sha piti, na osheenditho shika ina shi vula okulandulwa molwaashoka onomola ndjoka kaya li yoshili.’omusamane Magnus Nangombe omuperesidende gwo Nabta osho a tseyithile othe Namibian ngaaka.Okwa ti oonomola ota dhi ka longa nawa uuna omapangelo giilando ga tameke oku tula oolamba kombanda yiiyenditho ayihe mbyoka ya pewa uuthemba oku tuta,aafaalelwa moshilando.Omandhindhiliko ngaka giiyenditho mbika oga longwa kehangano lyokoAmerika li li moChina, ndele iilonga mbika oya katekwa molwaashoka natango oolamba ndhika ina dhi thika.Oku tula oonomola kiiyenditho yokututa aafaalelwa iilonga yoshilando sha Venduka, mbika ota yi ningwa uuna osheenditho kehe sha konakonwa nawa kutya ina shi longithwa iilonga yuulingilingi.Oolamba ota dhi patelwa ko kiiyenditho kehangano limwe alike lyopaumwene, ndyoka ta li kala ta li longele oku za moongalashe dha Nabta poombelewa dhehangano moVenduka.Nangombe okwa londodha kutya ngoka ta ka adhika ta longitha onomola yiifundja kosheenditho she ‘ota yi kondholongo’.’Opo iiyenditho yaa li pampango yi vudhwe mo otwa pumbwa omandhindhiliko geli kiiyenditho na ehangano limwe alike ta li longo iilonga mbika nokugandja endhindhiliko ndika.’ Nangombe ta popi nomuthindo.MoVenduka amuke omuna konyala iiyenditho yokututa aafaalelwa yi li omayovi ga 7 000, nelelo lyoshilando olya dhiladhila okukutha iiyenditho konyala yi li pokati kiiyenditho 2 500 sigo 3 000 mbyoka itaa yi longo pampango uuna ndoka omulandu omupe gwa tulwa miilonga.Oonkambadhala otadhi ningwa opo pu manithwe etulomiilonga lyompango yiiyenditho, ndjoka ta yi ka thiminika osheenditho kehe hashi tutu aantu shikale nendhindhiliko komutse gwasho.Noshowo ompango ndjika ota yi thiminike osheenditho kehe shi kale nepaya lyomakonda omatokele nomaluudhe molumbumbu lwosheenditho koombinga adhihe dhosheenditho.Ompango ndjika ota yi thiminke woo iilando opo yi gandje omahala gokuthikama iiyenditho mbika pambelelwa.Oshinakugwanithwa oshikwawo shompango ndjika osho shika kutya iiyenditho yokututa aantu mbyoka ya longa nale oyi na okukala ashike yeenda nenge ya longa uule woomvula ntano.Nangombe okwa ti sigo oompaka ehulilo lyomwedhi olyo ethimbo mpoka ta pa hulile egandjo lyoonomola ndhika, ndele Nabta ota ka tsakanena nopolisi yaVenduka opo ya kundathane kutya oshike ta shi ningwa po.Ota shi vulika opolisi ta yi gandja esiku epe moka ta mu hulile egandjo lyoonomola ndhika.