Oombudhi dhakwatwa peyinda lyopolisi

OPOLISI yaVenduka oya kwata aafekelwa yeli yatano miilonga yokuyuga. Aafekelwa mboka taya fekelelwa omayugo moshilandopangelo oya kwatwa ongula yetiyali konima sho ohauto yawo ya hadhwa kopolisi.

Mbaka aniwa oyaadhika yena iilongitho mbyoka hayi longithwa mokuteta iipeleki uuna mbaka taya yaka okupitila moombuli.Yaali yomaafekelwa mbaka aniwa oya adhika pondje yondholongo yiifutilamo kombinga yomayugo galwe. Superintendende, Johan Kellerman gwopolisi ya Venduka okwa ti mbaka oya kwatwa konima sho opolisi ya yi molukongo sha landula iiningwanima yomayugo mbyoka yakala ta yi inyenge omasiku gapiti moshilando. Aafekelwa mbaka oya kwatelwa peyinda lyopolisi pokati ka Venduka nokapale koondhila kopaigwana ka Hosea Kutako. Opolisi oya li ya yakelwako kutya opena oombudhi tadhi pulana okukayaka olodge yimwe mondjila yokuya kokapale koondhila. Pobloka yopolisi, ohauto yawo oya hadhwa naalumentu mbaka oya kwatwa niilongitho yawo yokuteya tayi kuthwako. Oyaadhika yena omakende gogasa noshowo iilongitho yokuteta iitenda nogasa yahwama. Kellerman okwa ti opolisi otayi fekele kutya omulumentu gumwe omuhingili gwaantu mboka omanga yane yomuyo oyo ongundu yaafekelwa futhi mboka haya yugu. Moshiningwanima shimwe opolisi oya lopota kutya oombudhi odha tete iipeleki yostora ya Woerman Brock moKatutura etaya yaka mo iimaliwa yoodola 50 000, koomuma. Opolisi oya li ishewe yiithanwa kositola ya Game moVenduka konima sho oombudhi dhatete iipeleki yondunda ya game nokuya momagandjina moka ya kuthamo oolaptopa dhongushu yoodola 13000. Kellerman okwa gunu aanangeshefa opo yaakaleke we omiyalu dhiimaliwa oyinjdi poositola dhawo . Nongele oyena iimaliwa ya thigalamo oyindji oyena okutseyithila opolisi, opo ndjika yi vule okupatolola ehala ndyoka. Ishewe na ya kale haya konakona nawa aantu mboka yo taya pe iilonga, oshoka omathimbo gamwe uufuthi ohawu ziilile meni.