Oombudhi dha dhitikwa moBotswana

AAKWASHIGWANA ya Namibia yaali oya holokele komeho gompangu yamengestrata moGaborone lwopehulilo lyomumvo gwayi, metamaneko lyuufuthi wiimaliwa oyindji. Iimaliwa mbika aafekelwa mbaka ota ku tiwa oye yi yaka kaapunguli yomombaanga .Oya li ya yaka mbika molupe lwiimaliwa ya Botswana.

Marco Panduleni Nangombe[25] na Ricardo Bogosi[31] ayehe aakalimo yomo Mbundu ya Kiiyala[Oshiwakopo] ota ya tamanekelwa omatamaneko geli 22 okwiimonena iimaliwa mbika momukalo gwiifundja nenge mokuholoka ya fa oyo ooyene yiimaliwa mbyoka.Ota ku tiwa mbaka oya yaka omauyelele gaaniimaliwa okuza kuukalata wayo wokredit nokuwu ninga okopi. Omageeelo ga tatu oge na sha nelongitho lyokakalata pwaa shi paveta, sho ya futu ohotela yedhina Diamond Inn moshilando sha Tlokwenge, oya longitha okakalata ka Anna Raja Ram hoka ya kutha ko oopula 400, noonkwawo 1450.Momasiku 30 ga Maalitsa ota ku tiwa mbaka oya li ya yaka oopula 300 okuza kombaanga ya Stanbic ya longitha okakalata ka Mmoloki Tibe sho ya futu Fashion Lounge nesiku olyo tuu ndyoka oya kutha mo iimaliwa yoopula 2 716.Oya tsikile ishewe oku yaka Mmoloki Tibe mokufuta iilandomwa oyindji poositola ngaashi Liquroama, mepandaanda lya Broadhurdst, oya longitha okakalata ka Tibe natango,ya futile iinima po Liquorama-Lido General na LiquoramRiverwalk, Kaunda Service Station nopomahala woo galwe. Oya longitha iimaliwa oyindji, ta yi ihile koopula dhomathele gomayuvi ogendji.Mbaka yaali oye li mondholongo ya tegelela okupulakenwa.