Oombotsotso ne dha homata dha ya niimaliwa yAachina

OPOLISI moshitopolwa sha Shana otayi kongo aamentu ye li yane lwaampoka,ye yile mOsitola yAachina mOngwediva ongula yOsoondaha ya zi ko ya homata oondjembo e taa yi niimaliwa yomOsitola moka yi li pOondola/N$13,800 lwaampoka noshowo iinima yimwe.

Omugandjimulombo gwOpolisi moshitopolwa sha Shana Shisaande Christina Fonsecka, okwa tile kutya aalumentu yane, ongula yOsoondaha ya zi ko, oyi iteyele mositola yAachina yedhina Sky China Shop yi li pooha dhOngalashe yOmahooli ya tate Chris Nunes mOngwediva, ya homata. Taya lombwele aaniilonga yomositola moka kumwe na sekuriti gwawo kutya naya lale ngele inaya hala okusa. Taye ya manga komeho. Taya kutha mo iimaliwa ya li moka nokufadhuka po nokahauto kawo aniwa kokatuukara oka Toyota Corolla. Opolisi otayi ya kongo.Ongulohi yOsoondaha ndjoka ya zi ko, aamentu ye vulithe puyaali, oyi iteyele megumbo lyAafilipine moshitopolwa shondoolopa ya Ndangwa shedhina Shinime shIivula, taya lombwele ooyene yegumbo ya kale ya mwena, taye ya tilitha noondjembo nokukutha mo Ooselefona dhawo niinima yilwe.Taya kutha iipatululo yokahauto kAafilipine mboka nokufadhuka po nako uusiku mboka. Okahauto haka oka ka adhika lwopOkatana koongulu popepi nOshakati ongula yOmaandaha goshiwike shika. Aamentu inaya adhika po, nOpolisi otayi ya kongo. Aafilipine mboka ya yugilwa iinima yawo komulungu gwondjembo, ohaya longele omunangeshefa a tseyika nawa tate Otto Mwandingi Kapia, ngoka, omathimbo ga zi ko, a li Meya gwondoolopa ya Ndangwa.