Oombaanga dha indilwa dhi shune iiholela ya dho pevi

OOMBAANGA dhopaipindi odha pewa ethimbo sigo opehulilo lyomwedhi nguka opo dhi tule poopelesenda 11,5 iihohela yadho yakwaalukehe naambyoka hadhi futitha,koongunga dho kulanda omagumbo.

Sho a popi noshifo shika omaandaha omuwiliki gwoMbaanga yaNamibia, omusamane Tom Alweendo okwa ti, oombaanga ndhika odha li dhi na oku sa oshimpwiyu kutya uuwanawa wiihohela ya shuna pevi owa monika woo kaayakulwa yadho, oku ya pehulilo lya Kotoba nuumvo.Shika osha hala okutya oopelesenda dhiitsa 450 ndhoka dhi li eyooloko pokati kiihohela yOmbaanga yaNamibia niihohela mbyoka Oombaanga dhopaipindi ha dhi futitha aayakulwa yadho.Ngashingeyi iihohela yombaanga yaNamibia oopelesenda 7. Iihohela mbika ohayi futwa koombaanga dhopaipindi uuna ndoka dha lya oongunga kOmbaanga ya Namibia.Alweendo okwa ti eyooloko ndika miihohela oli na woo oku gandjwa nokoongunga dhi na sha nokulanda omagumbo.Sigo oompaka Ombaanga ya NedBank Namibia oyo ayike yi iyutha keindilo ndika lyOmbaanga yaNamibia. Ombaanga ya Nedbank oyi na iihohela yawo ayihe yithike pamwe ya thikama poopelesenda 11,5 , mbyoka ya kwaalukehe naambyoka yoongunga dho kufuta omagumbo.Nonando iihohela yakwaalukehe yoStandard Bank oyi li poopelesenda 11,25 pevi lyondondo ndjoka ya uthwa kombaanga yaNamibia, iihohela yomagumbo natango ka yili momusinda nondondo ndjoka yOmbaanga ya Namibia yoopelesenda 11,50. Iihohela yomikuli dhomagumbo yoStandard Bank oyi li oopelesenda 11,75 ngashingeyi.Ombaanga ya Windhoek naandjoka Yotango Yopashigwana(FNB) adhihe iihohela yadho yomagumbo oyi li poopelesenda 11,75 omanga mbyoka yakwaalukehe yi li poopelesenda 11,5 pondondo ndjoka ombaanga yaNamibia ya hala opo dhi kale dha thikama.Oonkundathana kombinga ye andjakano lyiihohela pokati kOmbaanga yaNamibia noombaanga dhopaipindi ota dhi tsikile, nOmuwiliki gwoMbaanga yaNamibia, okweekelehi omapopyo ngoka taga ti oonkundathana ndhika odha adha ekwena lya thita.Eyooloko ndika olya kala eshongo enene, nomuwiliki gwoMbaanga ya Namibia, Alweendo okwa ti shika ita shi vulu oku yambidhidhwa.Kuyele nuumvo Alweendo okwa tseyithile oombaanga ndhika opo dhi shune iihohela yadho ando sigo oopelesenda 3,75 oku ya pehulilo lyomvula.Oombaanga ndhika odha pula Ombaanga yaNamibia opo yi undulile ethimbo ndika komeho, Alweendo tati. Ndele elalakano ndika lyo ku shunitha pevi iihohela natango ota li kundathanwa.Omusamane Alweendo okwa ekelehi woo omapopyo kutya ota ka thiga po iilonga ongo omuwiliki gwOmbaanga ya Namibia omanga oshikako shiilonga ye inaashi hula mo 2011.Okwa ti ina dhiladhila oku ethapo iilonga ando manga ethimbo lye inaali pwako.Okwa tindi woo okuwalyayeka kutya ota ka pewa ishewe ompito onkwawo opo a kale natango mewiliko lyOmbaanga ya Namibia, eta gwedha ko ta ti oomvula 15 muuwiliki wOmbaanga ya Namibia ethimbo ele.