OoKandowa ya gandja okompiuta kOsikola ya Maandje

OMUKALIMO gwomomukunda Epyoliwa mOshikulufitu mOmbalantu mo Musati tate Amandus Kandowa negumbo lye, mEtine lyoshiwike sha zi ko (17.09.2009) oya gandja okompiuta nOprinda yayo kOsikola ya Maandje, ya pewa Omukuluntusikola gwOsikola tate, Marius Alweendo.

Osikola Omaandje, oyi li mAnamulenge moMusati, noshituthi shegandjo lyomagano ngaka, osha li sha egululwa negalikano kOmukuluntusikola gwotango meme Stella Maris Shanghala, e li moshipundi shevululuko, nokuwilikwa kOmulongisikola tate Josef Akushanga.Pethimbo ta gandja omagano ngaka gokompiuta nOprinda kOsikola Omaandje, tate Amandus Kandowa, ngoka e li gumwe gwaalongwa yotangotango pOsikola ndjoka, nokwa li a ende pamwe nomukulukadhi gwe meme Evarosa Kandowa, okwa ti kutya ye, onga gumwe gwomaalongwa yotangotango pOsikola ya Maandje mpoka, okuza momuthitu gwaampoka nokuya mpoka yi li ngashingeyi, okwa tokola pamwe negumbo lye, a gandje omagano gokompiuta kOsikola yawo ndjika molwashoka pethimbo lyanangashingeyi olya pumbwa aantu, unene oshigwana shokomongula sha longwa uunongononi, unene tuu mboka wopaekoompiuta.Okushiwa okukonga omauyelele to pitile mewanga ndjo nokukwatakana nuuyuni to pitile paekoompiuta (Internet) nosho tuu.’Itashi ti kutya ondi na oshimaliwa oshindji nenge ndi na Ookompiuta odhindji nOprinda, ihe, pauvathano nOfamili yandje, ano nomukulukadhi gwandje, onda tokola ashike okugandja po okompiuta ndjoka nda li ndi na po manga.Aanona yetu inaya koka natango, no tu wete kutya mpoka ya ka kokela, otaya adha ngaa twa gongela po natango oshimaliwa shoku ya landela okompiuta yawo.Ondi wete wo kutya otashi ka kala oshiwanawa okugandja ontseyo yuunongo wokoompiuta koshigwana oshindji shi vule sho to yi gandja kaantu aashona momuyalu. Ano okugandja omagano guunongo mbuka kAanasikola oyendji ye thike mpaka, kungaye ondi wete shoopala noshuuka. Ano, ngaye nomukulukadhi gwandje otandi mu pe omagano gokompiuta ndjika nOprinda, yi humithe komeho oshigwana, unene tuu shoka shokomongula shoposikola mpaka,’tate Kandowa ta ti ngawo.Tate Ameya okwa pandula tate Kandowa nOfamili ye sho ya gandja omagano ga simana ge thike mpoka kOsikola ya Maandje. Omukuluntu gwOshikulufitu Cluster, tate Ameya nguka ta indile kewilikosikola lya Maandje nokaanasikola naavali ya kwate nawa omagano gawo ngaka noku ga kaleka ge li megameno ewanawa. Omukuluntusikola gwa Maandje tate Alweendo, naye okwa pandula noonkondo tate Kandowa nOfamili ye. Ta kumike aanasikola yii itule mo nawa meilongo lyokoompiuta nomiilongwa yilwe, opo ngele ya mana no ya mona iilonga ya ka kwathele Osikola yawo moompumbwe dhi nili nodhi ili ngashi tate Kandowa te shi ningi ngeyi. Tate Alweendo ta uvaneke kutya otaya ka takamitha nawa omagano gawo ngaka noku ga kaleka ge li megameno ewanawa.Mwene gwomukunda Epyoliwa, tatekulu Nangolo naye ta pandula omumati gwe Kandowa nOfamili ye. ‘Kahuhwena hadhela nyoko, nyoko onale e ku hadhele,’tatekulu Nangolo ta lombwele Kandowa nOfamili ye ngawo.Kaansela Kanyenye naye mokupandula tate Kandowa nOfamili ye, okwa tsu oshigwana shokomongula omukumo shi ilonge opo shi ka kwathele oosikola dhawo mpoka sha longwa noshowo okweeta ehumokomeho momikunda dhawo.Ta ti aalongwa naalongisikola naya kale taya lalakanene omauwanawa goosikola dhawo nokwiitula mo miinima ayihe mbyoka tayi lalakanene onkalonawa yoshigwana.