Ookaansela inaya longa po we iilonga yOkomisi yOmahogololo; Ndjoze ta ti

OSHILYO shOngundumutima gwo RDP, Victor Ndjoze okwa indila kOkomisi yOmahogololo ya Namibia kutya inayi etha we iilonga yayo tayi longwa po kOokaansela, unene tuu moNooli ya Namibia, oshoka mbaka ohaya pitile mo nokuninga omahwahwameko niikonga yawo yOpolotika yOngundu yawo yOswapo, oshinima shoka kashi li pauyuki nandenande noshi na okukalwa moshipala meendelelo ngashi tashi vulika.

Omugundjuka nguka gwomo RDP, Ndjoze oshinima shika okwa li e shi popi moshigongi shoongundu dhOopolotika nOkomisi yOmahogololo ya Namibia, sha ningilwe mOshakati meti 2 Septemba 2009.Ndjoze ta ti, omathimbo ngoka ga zi ko, Ookaansela yIitopolwa, oya kala taya popile ko Okomisi yOmahogololo, unene tuu mOprograma yongula yedhina ‘Lungada’, moka oyo yi ininga Aanambelewa yOkomisi yOmahogololo nokulonga po iilonga yOkomisi yOmahogololo, yo taya pitithile mo nee etumwalaka lyawo lyOswapo. Ndjoze ta ti, Ookaansela, unene mboka yomoNooli, ohaya dhimbwa kutya oye lile po oshigwana ashihe shi li mIikandjohogololo yawo, nohaya kala ye na ombinga momayakulo gawo goshigwana gesiku kehe mIikandjohogololo yawo moka. Taye ya kiigongi yaakwashigwana ayehe, ye li momizalo dhOngundu yOswapo nokupopya ashike shoka shi li muuwanawa wOswapo, nokudhimbwa kutya, mIikandjohogololo yawo moka, oye lile po aantu ayehe, kutya nee oyomOongundu dhini dhOpolotika nenge yOongeleka dhini nosho tuu, nenge ngaa mu kale wo mboka inaya gama nande okongundu yini yopolotika.Taku tiwa Kaansela gwomoNooli, gwOswapo, ota ithana oshigongi shoshigwana tashi fatulula ngeno omainyolitho nelongo lyomahogololo, ashike manga oshigongi shoka inashi tameka, nenge konima yasho, Kaansela ngoka, e li nokuli momuzalo gwOswapo, oku na okuninga oshigongi shOswapo, ano okupopitha oshigwana shoka, te shi lombwele omalalakano gOswapo.Ha dhimbwa kutya oshigongi shoka a ithana osho shigwana ashihe shomOshikandjohogololo she, sha thikama maantu yOongundu dhi ili nodhi ili dhOpolotika mOshikandjohogololo she shoka.’Ano ne, ongAanambelewa yOkomisi yOmahogololo, longeni ne yene iilonga yeni, inamu etha we yi longwe po kookaansela. Inamu popilwa ko we kOokaansela oshoka Ookaansela oya gama nale ombinga yimwe, ano yOswapo, omanga aantu mboka tayi inyolithile omahogololo mIikandjohogololo moka kaye shi ashike yOswapo, ihe mu na wo yOongundu dhilwe dhi ili dhOopolotika,’Ndjoze ta ti ngawo nokugandja eiyuvo lye kutya Ookaansela dhIitopolwa kadha li dhi na okuza mo mOombelewa dhadho pethimbo ndika nokukahwahwameka oshigwana pa Polotika, yOswapo, oshoka, sho dhi li mOombelewa moka, odhi lile po aantu ayehe mIikandjohogololo yawo moka, sigo opethimbo ndyoka taku tiwa kutya ethimbo lyiilonga yadho olya pwa ko, na naya ye nee ya ka ninge iikonga yomahogololo, ongAanapolotika yoongundu dhawo dhoopolotika, ihe hangashi taye shi ningi pethimbo ndika, ye li momizalo dhOswapo.mOshigongi omo tuu moka omwa popiwa kutya oshigwana shokoNooli oshindji natango kashi shi uuthemba washo. Kashi shi Uudemokoli, nosha pumbwa okulongwa shi shiwe uuthemba washo noshowo kutya Uudemokoli otau ti ngiini naanaa.