Ontopa ya Niipa otashi vulika yi ngumuke po ombinga yimwe

ONTOPA ya Niipa moshitopolwa sha Shikoto otashi vulika yi ngumuke po ombinga yimwe ngele inaku endelelwa yi tungululwe, unene tuu mpoka tayi hala okungumuka po.

Omunashipundi gwElelo lyOshitopolwa sha Shikoto, Max Nekongo, noku li Kaansela ,gwOnayena, ta ti ye mwene okwa nyengwa okuuvako kutya Aantu mboka haya pewa iilonga kEpangelo ya opaleke nokutungulula oondjila, oontopa nosho tuu, omolwashike inaya hala okugwanitha po iilonga yawo. Ta ti ngashi oshinima shengumukopo lyombinga yimwe yOntopa ndjika ya Niipa, oye shi popya nale naamboka ya pewa iilonga yokuwapaleka ontopa ndjika mpoka, ashike oshi li oshikumithi sho sigo okonena ndjika ontopa ndjika mpoka inayi opalekwa natango. Ano, omolwashike Aanamibia tatu ningi ngawo? Omolwashike ano Aanamibia tatu nyokoma nokufailitha Epangelo miinima ngashi mbika? Otatu uhala noshigwana tashi nyenyeta kutya Epangelo itali longo. Itali wapaleke iinima, omanga Epangelo tali uhala ta li gandja iilonga niimaliwa kaakwashigwana yamwe mboka ye na oshinakugwanithwa shokuwapaleka mbyoka ya yonuuka, ndele itaye shi ningi. Otwa uka peni ano nonkalo yatya ngawo? Nekongo ta ti ngawo nokupula ngawo neyeme enene. Ta indile kOshikondo shOondjila shi opalekithe meendelelo ontopa ndjika ya Niipa pehala mpoka yi li pokungumuka po. Ta ti oshinima shoka, okwe shi popya nale nAanambelewa yOshikondo shOondjila mOshitopolwa, ihe kemanya kuza wo ontsi.