Ontengenekothaneko yokunyanyudha yaMuni gwaVenduka oya pumbiwaOntengenekothaneko yokunyanyudha yaMuni gwaVenduka oya pumbiwa

OMUNAMBELEWA omukuluntu gwaMuni gwaVenduka omusamane Niilo Taapopi ota ti iimaliwa mbyoka yatengenekelwa okulongithwa mokunyanyudha nokuyakula aayenda yamuni oya pumbiwa ngaashi ya thanekwa.

Nonando omahupilo moshilongo nomuuyuni ota ga ende nuudhigu muni gwaVenduka otaka longitha omwaalu ngoka ngaashi gwa thanekwa momutengenekothaneko gwomumvo gwo 2009/2010. Ndele Taapopi okwa tsu omuthindo kutya shika ita shi ti kutya oshilando kashi wete uuyuni nkene wu li ngashingeyi. Montumwafo ndjoka ya pewa aakalelipo yomahangano lyoNamibian Employers Federation, lyoPublic Service Union of Namibia,lyoNamibia Consumer Trust noshowo lyoCitizens for Accountable and Transparent Society poshigongi mEtitatu lyaziko, Taapopi okwa ti iimaliwa mbyoka yi na okulongithwa, ngaashi okunyanyudha nokuyakula aayenda oya pumbiwa mokukwatela komeho oshilando.Omiyalu dhoshilando kombinga yokunyanyudha nokuyakula aayenda odha pewa oombelewa melelo lyoshilando ngaashi tashi landula, ombelewa yomusamane Taapopi noomeningela dhopombanda oodola 140 000, ombelewa yamayor Matheus Shikongo oodola 25 000, ominyanyudho ga kwalukehe oodola 143 000, okunyanyudha mboka taya penzelwa oodola 87 000,omainyanyudho gashewa gaaniilonga yamuni oodola 220 000, okulanda sha shokulya oodola 132 588 omanga mbyoka tayi longithwa petokolamumvo oodola 215 000. Nonando oshilando osha zimina omiyalu ndhino Mayor Shikongo sho a egulula oshigongi shewilikongundu lyamuni shotango shomumvo gwiimaliwa gwo 2009/2010 okwa uvaneke kutya elelo otali kambadhala okuhwepopeka onkalamwenyo yaakalimo yaVenduka moku ya pa omayakulo omawanawa.Shikongo tati ‘otu shishi nokutya aantu yetu oyendji natango oya hepa.’ Shikongo okwa ti woo kutya okunyenyeta kwaakalimo moshilando okwe yapo molwaasho kaa uviteko omukalo nkene omutengenekothaneko gwaVenduka hagu tungwa po. Taapopi okwa ti montumwafo komahangano gatumbulwa pombanda tati oge na okutseya kutya oshilando oshinene onkene omutengenekothaneko gwaziminwa ogwa pumbiwa. Okwa ti iimaliwa yomainyanyudho iishona okuyeleka niimaliwa hayi longithwa komahangano galwe moshilongo.Okwa ti Mayor gwaVenduka ogumwe gwaanenentu moshigwana oshoka konyala oyendji yomaatalelipo moshilongo ohaya talelepo omunani gwaVenduka uuna ye ya moNamibia.Onkene osha tegelelwa kutya aatalelipo mbaka ya yakulwe nawa.Shono a pulwa kombinga yiimaliwa 215 000 getokolamumvo okwa ti aakalimo yaVenduka oyo ya pula omwaalu ngoka.Kombinga yomwaalu gwoodola 143 000 Taapopi okwa ti ogwo kugandja oondya pethimbo lyiigongi yokomwedhi yelelo lyoshilando,iigongiilonga noshowo okuyakula aatalelipo.Iimaliwa mbika oyatengenekwa pamwe niikwawo oodola 132 588 nayo woo yi nasha niikwaikulya niikunuwa.Taapopi okwa fatulula kutya oodola 87 500 mbyoka yiitulilwa okuningila mboka taa penzelwa elaleko oyi li oshitopolwa shiiyemo yawo ongaa niilonga yamuni.Omwaalu nguka ohagu thanekwa shiikwatelela kaaniilonga mboka taya yi mopenzela omvula ndjoka.Omwaalu nguka ogwa ya pombanda noopelesenda 25 okuyeleka nomutengenekothaneko gwomvula yaziko.Taapopi okwa tindi okugandja uuyelele kombinga yoondjambi dhaaniilonga yamuni noshowo oofuto yaaleli yoshilando shaVenduka, tati pautho lyompango yOmapangelo giilando oondjambi dhaaniilonga oshiholekwa shomuniilonga kehe.Pamutengenekothaneko gwomumvo 2009/10 Mayor noshowo ocouncillor dhe moVenduka otaa ka futwa kumwe oodola oomiliona mbali oshinkwanu heyali. Muni otaka longitha oomilion 462 konyala oopelesenda omilongo ndatu dhomutengenekothaneko aguhe gwoshilando mokufuta oondjambi dhaniilonga.Oodola omiliona 115 odhiigwedhelwa maliwa.Omutengenekothaneko oguna woo oomiliona 88 okufutila aaniilonga omagumbo noomiliona 20 okuya futila omalweendo.Aaniilonga ayehe yamuni otaya vulu okwiilandela omagumbo yo ayehe ohaya pewa oshimaliwa shomalweendo okuya nokuza kiilonga omanga mboka taa wilike iikondo yi ili noyiili ohaya pewa oshimaliwa kehe mwedhi okwiilandela ohauto ndjoka ta vulu. Omiliona 4,5 odha thanekelwa woo iifuta yimwe yina sha naaniilonga ndele inaku tothwa mo kutya oya shike.Omusamane Taapopi okwa kwashilipaleke omahangano ngoka taga nyenyeta kombinga yomutengenekothaneko kutya elelo lye otali ka tala nawa kehe oshimaliwa tashi longithwa opo li se oshimpwiyu kutya osha longithwa nawa.Mayor Shikongo nando okwakombo kombunda aakalimo yaVenduka shono ya kutha ombinga melelo lyoshilando shawo okweya londodha woo kutya oyena okutseya kutya yo pamwe naawiliki otaya vulu okutunga nenge okuteya po shoka sha tungwa uule woomvula odhindji.Onkene osha pumbiwa opo aaleli pamwe naalelwa ayehe ya palamene shoka shasimana sho osho okugandja omayakulo omawana kukehe gumwe moshilando.Okwa ti elelo lye otali tsikile okutaamba omathaneko, omanyenyeto noshowo kehe eiyuvo aakalimo yena kombinga yelelo shina sha noku kaleka oVenduka ehala ewanawa nokukala.Omahangano ngaka NEF,PSUN,NCT,noshow CATS otaga ka tsakanena ishewe newiliko lyoshilando shaVenduka metine tuuka. Omahangano ngano oga tilitha kutya otaga ninga eholomadhiladhilo lyomangungo ngele muni gwaVenduka okwa tindi okutalula omutengenekothaneko gwe.