Omutotiveta Nico Smit Etivali okwa yelekanifa onotwaveta yomangudumano oshiwana nepangelo lokatongotongo olo kwa li tali fininike emangulu lomalinyengo ovanhu.
Smit oo ta ti okwa li e li oshilyo shepangelo lokatongotongo, okwa li ta kufa ombinga moshipopiwa kombinga yonotwaveta momutumba wopashiwana.
“Onotwaveta, tai dimbulukifa omaindiko ounyuni wokatongotongo, oye ya eshi Ovanamibia tava wanifa po oufemba wavo womangudumano opashiwana opo va popya oinima ya fimana kombinga yepangelo lopaife,” Osho a ti ngaho.
Smit okwa ti epangelo ola hala okushuna Namibia monima kounyuni winya manga kwa li ina manguluka tali shi ningi nokuwilika oufemba woshiwana wokungudumana nosho yo okuyandja omadilaadila asho.
“Eeveta dokatongotongo okwa li da nuninwa okushonopeka omangudumano oshiwana, tadi imbi ovakwashiwana va ongale ndee tava kundafana oupyakadi wavo kombinga yopolitika nosho yo yonghalafano, ndee opo onda hala okutya pule nge, okwa li ndi li umwe womuvo, okwa li ndi li oshilyo shosystema yavo,” Osho a ti ngaho.
Smit okwa itavela kutya okwaalula oveta ei yokuwilika omangudmano ovanhu omukalo wowina wokukelela opo oshiwana shiha ngudumane shi dule kuwanifa po oufemba washo wopaudemokoli wokupula elunduluko.
Okapambu kamwe konotwaveta omutotiveta oko a denga unene omufindo oko ko taka popi kombinga yeenghono tadi yandjwa kukomufalandjai kakukutu komatanga opolifi yaNamibia.
“Okatukulwa 3(5) konotwaveta okayandja eenghono kukomufalandjai wopolifi yaNamibia dokuhoolola ngee okwa tambula ko eindilo lengudumano loshiwana, osho sha yandja unene eenghono da pitilila komunhu umwe,” Osho a ti ngaho.
Minista woinima ya pamba oilonga, omakwatafano opeengeshefa nosho yo okutota eemhito doilonga Utoni Nujoma okwa nukila mo ndee ta ti okuwilika omangudumano oshiwana oshinima hashi ningwa komapangelo mounyuni aushe.
“KoUnited statae, ito fikama ashike. Owa pumbwa okukala u na epitikilo okudja kopolifi opo u ninge ehololomadilaadilo. Oshi li keshe pamwe, nokoGermany, keshe oshilongo mounyuni,” Nujoma osho a ti ngaho.
Okwa pula kutya oupyakadi ou li peni nokukonga epitikilo kukomufalandjai wopolifi nokopolifi.
“Kashi na sha nopolitika. Opolitika,” Osho a weda po ngaho.
Minista okwa ti Namibia ina kala a yooloka koilongo ikwao youdemokoli oko epitikilo lokuholola omadilaadilo la pumbiwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
