Onkalo yOokinde moshilongo otayi ka kundathanwa

OMUPRESIDENDE gwEhangano lyOosikola dhIikunino, ano dhOokinde moNamibia meme Lovisa Nashima, okwa tseyithila The Namibian oshiwike shika kutya Ehangano lyawo lyOokinde moNamibia, meti 15 Juni 2009, otali ka kundathana oshikumungu shOokinde moshilongo nOministeli yUukashikekookantu nOnkalonawa yAanona meme Marlene Mungunda pethimbo lyetalelopo lye mIitopolwa Otjozondjupa noshowo mOmusati okutameka meti 12 Juni 2009.

Meme Kashima ota ti kutya pethimbo nee lyetalelopo lye ndika mIitopolwa ya tumbulwa metetekelo, Minista Mungunda, okwa zimina wo e ye a kundathane nAakuluntu yEhangano lyOokinde moshilongo kombinga yomaudhigu
nomikundu ye dhi na shi na sha nonkalo yOosikola dhIikunino moshilongo, unene tuu mOshitopolwa shomUumbangalantu.
Oonkundathana ndhika meme Kashima ta ti, otadhi ka ningilwa poHeroes Primary School mOluno/mOndangwa mOmaandaha geti 15 Juni 2009. Oshigongi shawo shika ota ti kutya otashi ka tameka pomulongo (10H00) gwongula.
Omukundu omunene guniwe kEhangano lyOokinde moshilongo, ogo ngoka gwokuthiga po aalongi aakulu yOokinde kaye na iilonga sho Ookinde dhimwe tadhi yi mEpangelo.
Kashima ota ti nee kutya shika shimwe
shomomaudhigu ngoka ya hala ya ka kundathane na Minista Mungunda mesiku
ndyoka.
Minista Mungunda nosheendo she okuza kOvenduka, otaya ka thika mOtjiwarongo mOshitopolwa sha Otjozondjupa meti 12 Juni 2009 nokwa tegelelwa a ka ninge oshigongi nAawiliki yOokinde mOshitopolwa shoka ongula yeti 13 Juni 2009 mOtjiwarongo moka. Okuza hoka ote ya kOshakati nometi 14 Juni 2009 ota kala kOndangwa opo ihe meti 15 Juni 2009 a ka ninge nawa oshigongi nEhangano lyOokinde moNamibia po Heroes Primary School mOndangwamoka.
Meti 16 Juni 2009, ano mEsiku lyOkanona okaAfrica, Minista Mungunda otaka popitha oshigwana mOshikandjohogololo
sha Nesi mOshitopolwa sha Musati. Ina shi za mo natango kwali kutya openi mOshikandjohogololo sha Nesi.