Onkalo yefundja onkalo yoshiponga: Omupresidende Pohamba

OMUPRESIDENDE Hifikepunye Pohamba mEtiyali lyoshiwike shika okwa tseyitha kutya onkalo yefundja mOnooli yopokati nomOnooli yokuuzilo, oyi li oshiponga oshinene sha pumbwa omakwathelo gopaulumompumbwe.

‘Efundja ndika otashi vulika olyo eyonaguli noonkondo moomvula dhika. Osha yela, oli vule ndyoka lyomvumvo gwa zi ko sho nda li nda tseyitha onkalo yoshiponga momahala ngoka ga li ga gumwa,’ Pohamba osho a lombwele aanankundana ngaka pEgumbo ekulu lyEpangelo.
Omupresidende okwe shi koleke kutya aantu ye li 92 oya si omeya omanga aantu yamwe mo Caprivi nomOkavango ya ponokelwa nokudhipagwa koongandu nokoondjambaneya.
Omumvo gwa zi ko pethimbo olyu tuu ndika, Pohamba okwa li a tseyitha onkalo yoshiponga shefundja mOnooli, sho Epangelo lya nyengwa komeya gefundja moshitopolwa shika.
Efundja mOnooli olya teya po omagumbo, Oosikola, Iipangelo, omapaya, oongeshefa, oopata noontopa. ‘Efundja olya shunitha monima oonkambadhala dhEpangelo okukwathela oshigwana shi longe iikulya oyindji.
Pethimbo lyekuno, Epangelo olya li lya kuthile ko aanalimapya kondando yoombuto na oya li wo natanho ya pewa omambakumbaku dhEpangelo li itula kumwe naanalimimapya – nomvula yopetameko momahala moka mu na omapya, otayi ka eta eteyo li li nawa lyomomumvo 2008/9. ‘Mupya munene, efundja olye ya e ta li hanagulapo oshindji shoka dha longwa po, mwa ya oonkondo odhindji,’ Pohamba ta popi ngaaka.
Okwa ti manga efundja inali ya, Epangelo olya lio li ikalekele oshimaliwa shOondola oomiliyuna omathele gaali shokulanda iikulya yoshikukuta, ihe efundja lye nokuhanagulapo ashihe.
‘Otu na okamaliwa okashona ka thigala po,’ Pohamba ta ti ti ngaaka, ta tsikile ko kutya okamaliwa haka ina ka gwana okukwathela aantu ayehe mboka ya gumwa komeya gefundja.
Okwa ningi nee eindilo komahangan omakwathelo gopaigwana ga kwathele Epangelo omolu uupyakadhi mbuka.
Okwa ti omaopaleko goondjila, oontopa, Oosikola nIipangelo, oyo iinima ya simana noonkondo kwaayihe.
Pohamba okwa ti okwa pumbiwa wo iikulya, omiti,iidhindithi yomeya,oonete dhoomwenyo nomakumbatha. Pohamba okwa gandja elombwelo kEpangelo li lande natango uumbautu, pamakwathelo giilongo iikwathelo opo aantu ya mone omakwathelo nokufalwa komahala ngoka ga londa.
Okwa ti omapya ogendji moshitopolwa sha Cap[rivi, Kavango, Omusati, Ohangwena nOshana, oga yuulilwa komeya na oku na okumona iilya palwe opo ku yandjwe ondjala.