Ongudu yoNamibia Economic Freedom Fighters oya yandja oushima kokomisi yomahoololo

Ongudu yoNamibia Economic Freedom Fighters (NEFF) oya ti kutya okomisi yomahoololo yaNamibia oya “fya ohoni” eshi ya kufa Ovanamibia oimaliwa okupitila metokolo layo lokukufa oNEFF meengudu dopolitika.

Omupedu pelesidente wongudu yoNEFF Kalimbo Iipumbu Etine konima eshi omhangu yopombada ya popya kutya etokolo lokomisi yomahoololo kakwa li li li paveta nokwa li ya pewa i fute ovakalelipo vopaveta voNEFF okwa lundila okomisi yomahoololo kutya oi li po tai wilikwa koinima yopolitika.

“Oshinima ashishe okwa li ashike tashi ungwaungwa nasho papolitika koohandimwe ovo ve na ookaume hava longo mokomisi opo va piyaaneke oinima yeengudu donumba dopapolitika,” Iipumbu osho a ti ngaho.

Okomisi yomahoololo okwa li ya longifa etomeno kutya ongudu yoNEFF oya dopa okwoongela omikanda dayo doshimaliwa kokomisi ngaashi tashi pulwa kokatendo komahoololo mokuninga etokolo layo lokukufa oNEFF meengudu dopolitika muJuni.

“Okomisi oye lipyakidila tai tale omatomeno oo e li pepandja 51 letokolo lomhangu notai ka popya kutya oya fikama peni kombinga yetokolo lomhangu,” Okomisi yomahoololo osho ya ti ngaho Etine.

Mepangulo olo kwa li la yandjwa momhangu yopomabada mOvenduka etine, omhupanguli Thomas Masuku okwa mona kutya okomisi yomahoololo okwa li ya dopa okuyandja omhito koNEFF opo i yandje ehokololo layo, oshinima osho tashi pulwa shi ningwe kokatendo komahoololo omanga etokolo lokukufa mo ongudu meengudu dopolitika inali ningwa.

Natango okwa mona vali kutya okomisi yomahoololo kaya li i na etomeno lokukufa ongudu meengudu dopolitika eshi ya kufa oNEFF meengudu dopolika momafiku 17 Juni omanga efiku laxuuninwa okwa li 30 Juni olo kwa li la tulwa po kokomisi.

Okomisi yomahoololo yaNamibia okwa li ya tula po efiku eli momukanda wa nyolwa momafiku 24 Apilili, eshi kwa li ya lombwela oNEFF kutya ongudu oi na okuyandja omikanda domavalulo oshimaliwa omudo oo kwa li wa xula momafiku 28 Febuluali 2024 omanga omafiku 30 Juni inaa fika.

Pakutula po efiku laxuuninwa olo la tulwa po, okomisi yomahoololo oya ulikila oNEFF kutya itai ka katuka nande onghatu yasha omanga efiku laxuuninwa inali pita, Masuku osho a ti ngaho.

Natango oECN okwa li ya londwela ongudu momukanda womafiku 25 Apilili kutya otai ka longifa okatukulwa kokatendo komahoololo oko ke i pa oufemba i kufe oNEFF meengudu dopolitika ngee omikanda doshimaliwa dongudu domudo 2020,2021, 2022 no2023 inadi yandjwa moule womafiku 14. Omundjadjukununi woikwapolitika Ben Mulongeni Etine okwa ti okukufa ongudu meengudu okwa teya oilyo imwe yongudu omukumo nosha kakeka efano longudu.

“Okukufa ongudu meengudu dopolitika okwa teya po eenghono dongudu nosho yo omakanghameno ayo,” Osho a ti ngaho. “Osha pula yoo oimaliwa yovafuti voishoshela, shaashi oECN oya pulwa i fute. Eshi osha dundakana, kashi li mondjila nopandodo yopombada. Okomisi yomahoololo kai na noimaliwa nokuli,” Mulongeni osho a ti ngaho.

Okwa ti oshikumungu osha etela oECN efano lihe shi liwa notashi eta ovanhu va kale nomalipulo ngee oECN otai dulu ngaa okukwatela komesho omahoololo opashiwana muNovemba.

OTASHI PULA SHIHAPU
Eshi kwa li ta popi noikundaneki Iipumbu okwa ti ECN okwa hepeka oimaliwa yoshiwana omanga epangelo la pumbwa oimaliwa yoshikukuta.

“Otu na ovanhu tava fi, tava fi nena, tava fi mongula, tava fi nomefiku la landula ko. Ndee oshimaliwa eshi otashi dulu kwa li okulongifwa okuvatela ovanhu vetu ovo tava fi keshe fiku kondjala. Oshi lengifa nai,” Iipumbu osho a ti ngaho. Okwa ti oshimina eshi sha ningwa koECN shokukufa ongudu meengudu dopolitika osha eta ongudu i kanife oilyo nosha teyaula ongudu.

“Otwa kanifa oilyo ihapu, oitai ihapu oyo ya pumbwa okutalelwa po vali,” Osho a ti ngaho.

Iipumbu okwa ti ongudu oya longifa oshimaliwa shi fike poN$450 000 mokuungaunga noinima yopaveta eshi kwa li ya katukila oECN onghatu konima eshi kwa li ya kufwa mo meengudu dopolitika, tete momhangu yomahoololo, oyo kwa li ya tya kutya kai shi omhangu yokulonga noshikumungu shi li ngaho nosho yo momhangu yopombada.

Masuku mepangulo laye okwa ti otashi nyakula eshi eengudu dopolitika de lipakama mo momulandu welongo lopauyelele nosho yo ekalelepo omo da teelelwa di liufe kokwoongela omikanda domavalulo oshimaliwa domaliko ado, oipumbiwa, oiyemo koECN kodula.

Okudopa okuliufa kwaasho tashi pulwa kokatendo komahoololo kombinga yokwoongela omikanda doshimaliwa dokomudo koECN, oku na oilanduli yakula kelineekelo loshiwana, kashi shi ashike meengudu dopolitika, ashike nomomilandu adishe domahoololo, Masuku osho a ti ngaho.

“Oinima yokukalela po keshe osho wa ninga oye lipaka mo noya pumbwa okuluufwa kuyo, puhe na okufiya ko umwe oo ta teya oveta shi na sha noinima oyo, kutya nee ondjokonona yavo oi li ngahelipi ile ondodo yavo mopolitika,” Masuku osho a weda po ngaho.

Etokolo lokukufa ongudu yopolitika meengudu dopolitika ola kula, pakutala kutya otali dulu okweeta omawii e li ngahelipi koufemba wokukufa ombinga mopolitika waamenwa kekotamhango, Masuku osho a ti ngaho.

Molwetomeno olo, eengudu dopolitika inadi kufwa mo ashike mopolitika meendelelo, nande nee eengudu odi na ondjo mokuha wanifa osho okatendo komahoololo taka pula, omhupanguli osho a tumbula ngaho. “Okatendo oka kwatela mo kutya oufemba wokuudika nau li ufwe kuwo,” Masuku osho a ti ngaho
Ongudu yoNEFF okwa li ya kalelwa po kuKadhila Amoomo, omanga Lovisa Ihalwa naMbushandje Ntinda kwa li va kalela po oECN.