Ongudu yoLandless People’s Movement (LPM) otai ka koyelela ongudu yoPopular Democratic Movement (PDM) ongongudu yomilameno yopambelewa ngeno okwa li Ovanamibia tava ka hoolola paife ngaha.
Ouyelele ou owa dja koAfrobarometer.
Ongudu yoLPM otai kwa telwa komesho kuBernadus Swartbooi, omanga oPDM tai kwatelwa komesho kuMcHenry Venaani.
Oyelele ou okwa li wa pitifwa Etivali lwotete mondjokonona.
Owa ulika kutya eepelsenda di li 50,8 dovanhu ovo kwa li va kufa ombinga moshinima omu oda holola kutya otadi ka hoolola Swapo, omanga eepelesenda di li 5,6 tadi ka hoolola oLPM, epelesenda 5 otadi ka hoolola oIPC neepelesenda 4,9 oda ti otadi ka hoolola oPDM.
Ouyelele ou okwa li wa ongelwa pokati komafiku 14 Marsa fiyo 02 Apilili novanhu ve li 1 200 va hanga okuhoolola okwa li va ningilwa omapulaapulo.
Natango ouyelele owa holola kutya opu na omwaalu uhapu wovanhu vehe shi kutya otava ka ninga ngahelipi, u na eepelesenda 6,9 dovanhu inava ninga natango omatokolo, eepelesenda 9,2 inadi hala okunyamukula neepelesenda 7,4 tadi ti itadi ka hoolola nandenande.
Omukulunhuwiliki wehangano lokuninga omapekapeko omilandu depangelo Graham Hopwood okwa ti nande opu na omwaalu uhapu wovanhu inava tokola natango osho tava ka ninga nowovakufimbinga inava nyamukula, ouyelele ou otau ulike ondodo yeyambidido loshiwana eemwedi da pita.
Okwa ti ouyelele owa ulika kutya Swapo natango ota dana onghandangala nokapu na ouyelele wa wana kutya ongudu i lipipo tai ka ninga ongudu yomilameno yopambelewa.
“Kuvo ouyelele owa ulika kutya ova pumbwa natango okuninga shihapu opo va dule okuninga ongudu yomilameno yopambelewa. Swapo ota kala a hala okunghonopaleka ovaleli vaye natango,” Hopwood osho a ti ngaho.
Omundjadjukununi woikwapolitika Ndumba Kamwanyah okwa ti ouyelele owa ulika kutya Swapo natango okwa halika kOvanamibia vahapu.
“Ashike nee, omwaalu uhapu wovanhu ovo vehe na etokolo natango eepelesenda 6,9 naavo vaanya okunyamukula eepelesenda 9,2 otadi dulu okukala tadi ulike kutya ovanhu inava panda onghalo yopolitika yopaife,” Osho a ti ngaho.
“Eshi otashi dulu okweeta eemhito deengudu domilameno di mone eenghono ngee oda tale nawa koupyakadi wovahoololi ava,” Kamwanyah osho a ti ngaho.
Omunawino moinima ya pamba opolitika Johan Coetzee okwa ti ouyelele owa koleka kutya eengudu domilameno daNamibia natango oda topolwa unene, tadi dopa okulongela kumwe pamukalo oo tau dulu okukondjifa ongudu tai pangele.
“Eshi otashi ulike kutya opolitika yaNamibia ihe na elididimiko neengudu da tala dikwao kutya ovatondi ponhele yokulongela kumwe opo di ete po elunduluko liwa,” Osho a ti ngaho.
“Omahoololo oku li pokuuya. Ongudu tai pangele alushe oi na omhito iwa ndee itandi popi nokuli medina lemanguluka,” Osho a ti ngaho.
OKUMANGULULA OSHILONGO
Coetzee okwa ti eedula 34 konima yemanguluko, ondjokonona yemanguluko otai monika ya fa omukundu ponhele yoshinima shi na oshilonga.
“Oshinima eshi shokumangulula oshilonga otashi kanifa ongushu kongudu tai pangele nosho yo omaupyakadi ahapu okuhena oilonga, ehongo lihe shi liwa, oulingilingi, ewopedu tali i pombada moikondo yopaumwene, oyo kwa li ya pumbwa okukala oikondo yakula tai yandje oilonga, ashike paife otai xupu noudjuu,” Osho a ti ngaho.
Eshi a nyamukula kouyelele ou, omupopiliko wevava lovanyasha loSwapo Moses Shikerete okwa ti ouyelele ou inau kwatela mo lela ovahoololi vongudu koitopolwa yokomikunda.
“Molwetomeno olo ohandi lombwe oshiwana nomukumo kutya eepelesenda 50,8 odo tadi popiwa koAfrobarometer otashi duli hado ongudu yoSwapo tai ka mona ngee ovahoololi aveshe ova mono omhito yokukahoolola,” Osho a ti ngaho.
Okwa ti ongudu oi na omukumo kutya otai findana omahoololo neepelesenda di li pombada di dulife pwaado da tengenekwa.
OVAHOOLOLI VAPE
Ouyelele natango owa yandja omaliudo oshiwana moinima ya yooloka yomilandu doshilongo domahoololo neesystema dopolitika.
Ouyelele ou owa holola kutya eepelesenda 65,7 dovakufimbinga oda holola kutya okwa li da hoolola momudo 2019, omo oitopolwa yokomikunda tai ulike ekufombinga li li pombada leepesenda 73,9 okuyelakanifa needoolopa odo kwa li di na eepelesenda 58,5.
Mokati kaavo kwa li inava hoolola, omatomeno okutya okwa li inave linyolifa, okuhena ehalo ile elineekelo momilandu domahoololo.
Eepelesenda di fike po22,8 doshiwana okwa li dishona nokuhoolola ile inadi kufa ombinga, neepelesenda dishona itadi dimbulukwa ngee okwa li da hoolola ile inadi hoolola.
Okutala komahoololo oneudo, eepelesenda 91,1 dovanhu ovo kwa li vashona nokuhoolola momudo 2019 oda holola ehalo lokukakufa ombinga momahoololo neudo.
Kamwanyah okwa ti omatomeno okuhahoolola otaa limbililike nai mekufombinga lopaudemokoli.
“Natango opo tashi ka monika ngee ohokwe ei otai ka ya ngaa fiyo omokuhoolola kwashili,” Osho ati ngaho.
Ovanamibia vahapu ova fimaneka eengudu dihapu dopolitika, eepelesenda 73,2 dovakufimbinga oda itavela kutya eengudu dihapu dopolitika oda pumbiwa opo di ete omahoololo olela epangelo.p
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
