Omupedu pelesidente mukulu wongudu yoLandless People’s Movement (LPM) Henny Seibeb okwa lombwela ongudu yaye ikulu opo “i kule ndee tai pona okambi”.
Seibeb eshi okwe shi popya Omaandaxa koThe Namibian konima eshi a waimina ongudu tai pangele Oshoondaxa.
Ovaleli vamwe vongudu yoLPM ova sheka Seibeb eshi a waimina oSwapo, ongudu oyo a kala nokuponokela molwoulingilingi. Eedula nhano da pita, Seibeb okwa li a monika e na epulakata la shangwa “Voetsek Hage Geingob Voetsek”.
Paife, Seibeb okwa shuna kongudu tai pangele nota yandje oushima kovanailonga pamwe naye vakulu.
“Ova kana. Hangaashi voo, opu na ovanhu vaha pu ve udite ko novanhu vahapu voshili ve na onghenda nohole,” Osho a ti ngaho.
Okwa weda po: “Ondi udite etumba nohandi tyapula okushuna moSwapo, nohandi ka kufa ombinga meyambulepo laNamibia.”
Eshi a pulwa kutya okwa etelela shike koSwapo, Seibeb okwa ti okwa etelela “owino nounongo weyambulepo lakeshe umwe”.
Seibeb okwa fiya po ongudu yoLPM, ongudu oyo yee nomupedu minista mukulu womatendululo omadu Bernadus Swartbooi va tota momudo 2017, muJuni wodula ei.
Hamushangandjai woSwapo Sophia Shaningwa mOshoondaxa okwa ti Seibeb okwe mu lombwela ondunge yaye yokwaalukila kongudu.
“Ashishe osho nda pumbwa onye ashike muu yambidide shaashi okwe ya kunye pouyelele ine liholeka nande,” Shaningwa osho a ti ngaho.
Shaningwa okwa ti Seibeb omunhu a pumbiwa nokuna owino.
Seibeb okwa li a tambulwa ko opamwe novanhu ve li 200 ovo va waimina oSwapo koKhorixas.
Mafiku aa, Seibeb okwa li a longifa oWhatsApp yaye opo a twe Ovanamibia omukumo va hoolole Netumbo Nandi-Ndaitwah.
“Okuhoolola oungudu vashona okuhepeka omawi nokashi na eshi tashi eta,” Osho a shanga ngaho koWhatsup yaye.
Omupedu hamushangandjai woSwapo Uehekua Herunga okwa ti Seibeb kakwa li nande a tewaatewa mo moSwapo.
“Okwa li ashike a fiya po ongudu ndee taaluka. Shaashi ongudu oyo paudemokoli, okwa tambulwa ko nomaoko aeshe,” Osho a ti ngaho.
Herunga okwa ti keshe omunhu e li mopolitika ta pwilikine kwaasho ovanapolitika va popile monakudiwa ina kula papolitika.
Omupopiliko wongudu yoLPM Lifalaza Simataa okwa ti omapopyo aSeibeb kae li ponhele, shaashi oshiwana osho sha yandja oushima kuye ndee tashi yolo omapopyo aye nomikalo daye, kashi shi oLPM.
“Eshi oshiwana tashi dimbuluka omatukano aye a yuka kongudu tai pangele, nakufya pelesidente nosho yoo omukalo wavo wokulela ongongudu tai lele, opo ashike aalukile kongudu oyo tuu oyo a kala nokuula oinima ihapu.
“Oshiwana oshe shi tala kutya opolitika ashike yomedimo, ile yakulipi ku na,” Simaata osho a ti ngaho.
Okwa ti oLPM otai pula opo Seibeb e lipake mokulombwela oshiwana nghee oSwapo tai dulu okulela mepakumo leisho, shaashi osho otashi kala omukalo uwa wokukandula po okuyolwa kwaye.
Omundjadjukununi woikwapolitika Ben Mulongeni okwa ti ovanapolitika ngee tava fiye po ongudu, otashi dulika shaashi kave hole nghee omuleli wonumba ta wilike oinima.
“Omaukwatya omuleli ohaa tondifa ongudu kovanhu. Otwa pumbwa okuuda ko kutya omolwashike ovanhu hava waimine eengudu, omolwaashi omuleli owo muhoko wavo, okaume kavo, ofamili yavo, ova hala okuyelwaayelwa ile otava landula omukalo waye?” Osho a pula ngaho.
Omundjadjukununi woikwapolitika Rui Tyitende okwa ti opolitika yaNamibia oi hadi okutondauka.
“Ovaleli vahapu vopolitika ovo va fiya po oSwapo ohava shuna koSwapo ngee osho tava pula, va hala neemumbwe dikwao inadi wanifwa po eshi ve li keengudu domilameno,” Osho a ti ngaho.
Tyitende okwa ti okushuna koSwapo okwa kala oshiholelwa shakula sho ‘politika yokulya’ shaashi omatomeno oo a yandjwa keena sha nomilandu odo di li po.
“Onghee nee, oshike sha lunduluka? Peemhito dihapu okwa ti ewiliko loSwapo oli na oulingilingi nomafimbo amwe okwa li a hala okulwifa oilyo yopaliamente yoSwapo momutumba wopashiwana. Ove li kunda ndee tava tokola?” Osho a pula ngaho.
“Shimwe vali, momudo 2020, Seibeb okwa li a tya Sophia Shaningwa ke na owino ndee ta ti pelesidente Geingob okwa li omukanyamukulwa.
Otashi hokwifa, okwa li a tambulwa ko eshi e ya mongudu kuShaningwa oo kwa li a lundila kutya ke na eshi e shi,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
