Ongola otashi vulika yi galuke

OMUPEVI minista gwelongo, David Namwandi okwa londodha kutya otashi vulika ongola yi galulilwe pomanongelo ngele aalongwa ota ya tsikile okwiihumbata nayi.

Namwandi okwa lombwelele aalongwa tati ngele ota ya thiminike noonkondo mokwaaihumbata nawa, oongola otadhi galulwa.Okwa uvaneke kutya ita ya kiidhidhimikila aalongi yawo taya mbandamekwa .Namwandi sho a popitha aakuluntu sikola , aalongi noshowo aalongwa yondondo 10 no 12 poKeetmanshoop metitano okwa indile opo aalongwa ya idhilike okulongitha iingangamithi noshowo iikolitha noyiihumbate nawa ethimbo alihe, a ti omaihumbato gaafele itaga idhidhimikilwa.
Namwandi okwa londodha woo aalongwa opo ya yande okuyonagula omaliko ga holomende nogoshigwana.
Oshoka okuyonagula iinima owinawina ngaashi omatalashe, oohostela, omalamba, noshowo okuteya iinima yilwe otashi kanithile oshigwana iiyemo.
Aalongwa oya ti oyena uudhigu kombinga yaalongi ihaaya thiki nawa kootundi, omambo inaa ga gwana, aalongi ye na oombepo oombwinayi, naasho hapa piti ethimbo ele okupingenapo omulongi ngoka a thigi po iilonga.
Oya ti shika osho shimwe shoka hashi eta opo aalongwa ya kale inaa ya longa nawa mekonakono lyo ndondo 10 no 12.
Namwandi okwe ya yamukula ta ti aakuluntu sikola oya pumbwa oku katukila aalongi mbaka oonkatu dha yaga kegonga, okwa gwedha po tati uuministeli owiipyakidhila noku konga omambo ga gwana giilongwa.
Kombinga ya wo aakuluntu oya pula omupeviminista opo ya dhiladhile oku kutha po omukalo gwo kuundula aanona okuya kongundu ya landula oshoka shika osho tashi eta endopo mokati kaalongwa yoondondo 10 no 12.
Oya ti aalongwa oha ya thiki kondondo 10 noshowo 12 kaa ye shi okulesha nokushanga nawa omolwashoka oha ya undulwa.