Ongeleka ya Anglicana mOshakati tayi longololwa

OMUSITA gwOngeleka ya Anglicana mOshakati tate Eradius Mwaetako pamwe nAanegongalo lye, oye li ye uvite enyanyu nolupandu olunene sho Omunangeshefa a tseyika nawa tate Ben Hauwanga (BH) mwene gwoongeshefa dha BH nOpaaka ya Ngwediva, a tokola okulongitha nokuwapalekululitha etungo lyOngeleka ndjoka noshimaliwa she mwene.

Omusamane Hauwanga ngoka a tseyika nawa koyendji ha kwathele Oongeleka moompumbwe dhadho, etokolo lyokuwapalekululitha etungo lyOngeleka ya Anglicana ndika mOshakati, okwe li ningi ongulohi yEtitano lya zi ko pethimbo lyOshituthidhimbuluko sha mumwayina nakusa George Kakolonya Hauwanga gwomOshakati nogwEgongalo ndyoka lya Thomas Omuyapuki lya Anglicana mOshakati, kwali, ngoka a manene oondjenda dhe mOshipangelo shEpangelo sha Shakati meti 13 Apilili 2009 konima yuuwehame nomepipi lyomimvo 61 lwaampoka.
Pethimbo nee lyOshituthidhimbuluko she mOngeleka ya Anglicana moka ongulohi yEtitano lya zi ko, tate Ben Hauwanga, ngoka a popi pehala lyaamwayina, okwa lombwele Omusita gwOngeleka ya Anglicana mOshakati tate Mwaetako, Aakwanegongalo naalilasa ayehe kutya nakusa mumwayina George okwa li e mu pula ekwatho lyoshimaliwa ya opalekithe Ongeleka yawo ndjoka Unene tuun yabopalekithe mombanda yawo, ano oosilinga niipeleki.
‘Otwa adhika nee opo tatu yi muule weindilo ndika,na mumwameme a hulitha.
Onkee inandi hala ndi kanithe eindilo lya mumwameme, onda tokola okutsikila neindilo lye lyokuwapalekitha Ongeleka yetweni ndjika. Onkee otandi mu indile mu kale mwa kutha ko iipeleki ayihe mbyoka ndele tandi tula ko yimwe iipe opo etungo lyngeleka yetweni li kale lyoopala nawa notali monika nawa.
Inandi hala eindilo lya mumwameme, ndi mu kwathele mewapalekululo lyOngeleka yeni,. Otandi mu kwathele. Iipeleki yi kuthiiko ngula ndele tandi tulitha ko yimwe iip
meendelelo ngashi tashi vulika,’ omusamane Hauwanga ta ti ngawo. Pethimbo oly tuu ndyoka, omusamane Hauwanga okwa yi mondjato dhe, ta kutha mo oshimaliwa manga shi vulithe po N$10,000 noku shi gandja komukuluntu gwEgongalo meme Fransina Hauyave shi kale ongetamekitho manga lyetungululo lyOngeleka yawo ndjika.
Omusita tate Mwaetako, pehala lyEgongalo lye, okwa pandula noonkondo omagano ngoka omanene ga pewa Ongeleka ya Kalunga komusamane Hauwanga. Ta ti Kalunga ne mu yambeke.
Mokati kaalilasa, ongulohi ndjoka, omwa li wo Ominista yOmidhingoloko nOmatalelopo me Netumbo Nandi Ndeitwah, ngoka a popi pehala lyaavali, Oministeli yIinima yOmegumbo meme Rosalia Nghidinwa, Ominsiteli yOpevi yOmavi nOmatulululo tate Henock ya Kasita, ngoka a popi pehala lyOngundu yoSwapo molwashoka nakusa George Hauwanga okwa li oshilyo nomuyambidhidhi omunene gwOndundu yoSwapo, e shi ningi pehala lyOmuunganeki gwoSwapo moshitopolwa sha Shana tate Erastus Uutoni ngoka ka li po omolwiinakugwanithwa yilwe, palwe.
Moshituthi shoosa omwa li wo Omusita gwa Anglicana me Nangula Kathindi, ngoka wo naye e li Omukwanezimo gwa nakusa George Hauwanga, aakwanezimo nookuume oyendji lela ya nakusa Hauwanga nOfamili ye, ya za koombinga noombinga dha Namibia nayo opo wo ya li poshituthifumviko sha tate George mpoka. kOnamutai Oshituthifumviko osha ningwa kOmusita gwa Namutai tate Shekunyenge Nakale ta yambidhidhwa kAakwatheli ye yOpangeleka yawo.