Onganga nomupangi

. . . omukainhu e li monghalo ii konima eshi a
landifa po eumbo laye mOvenduka konganga

Eedula omulongo da pita, Elisabeth Neis okwa li omupangi e li nounona vaye vavali meumbo laye leenduda nhatu mOvenduka.

Paife, oku na eedula 66 e li moshipundi shetulumuko e li mokabashu, ta xupu ashike mopendjela yaye omanga ta mono oixuna koudu womutima.

Okwa ti oukolele waye owa wa pedu, shaashi okwa li e lineekela onganga oyo ye mu kengelela eumbo laye omanga kwa li tai ti otai mu vatele a lwife eemhepo dakaka.

Nande okwa kanifa oshibofa komhangu, oku na elineekelo kutya omhangu yopombada otai mu vatele opo a dule okumona oinima imwe oyo a kanifa.

Oilonga yaNeis yokuyakula ye mu twala fiyo oponghatu yokuhekwa komunaudu waye umwe. Omulumenhu oo kwa li ha vatele moshipangelo okwe mu lombwela kombinga yaye yonghalo yoshimaliwa oyo ihe li nawa ndee fiyo otashi ya ponghatu opo e mu vatela oshimaliwa shaye osho kwa li a tuvikila shi fike poN$100 000.

Konima eshi a lekekwa, okwa faduka po noshimaliwa.
Eshi a lulilwa kekanifo eli, Neis okwa li e lineekela momwainakadona oo e mu lombwela opo a ye konganga yOmumalawi Kenedy Kasume, momudo 2014.

“Kasume okwa ninga omulineekelwa kwaame, oo handi mu lombwele omaupyakadi ange aeshe,” Neis osho a lombwela oThe Namibian ngaho omwedi wa dja ko. Konima eshi va shakena oinima inai yela nawa oya tameka okuningwa.

“Osha tameka ngaa onguloshi imwe momudo 2014,” Omonakadona Elizeth Neis (36) osho a lombwela omhangu yopombada.

“Mumwamememati okwe ya meumbo a mbadapala. Okwe tu lombwela fyee nameme kutya pondje yeumbo opu na oshikola.”
Vakumwa voo ova tila aveshe ova lotokela pondje naina.

“Meme okwa dengela munhu umwe e uye keumbo. Konima yominute dishona, omulumenhu, oo nda ka shiiva konima yefimbo ongoKasume, okwe ya keumbo. Inandi mu mona nale ile nde mu uda. Okwa li e ya okukufa po oshikola ndee tai nasho. Okwa li ta monika a fa a li ashike popepi.” Elizeth osho a ti ngaho.

‘OKWA LOMBWELA
NGE NDI LANDIFE’
Komalungula, Kasume ohe liifana “Dr Andrew Sacharia” omuhakuli oo ha te po eemhepo dakaka, ha kufa po omupya nokwaalula eehole odo da kana.

“Kasume okwa ti ondi na omaupyakadi ahapu shaashi meumbo letu okwa li mu na eemhepo dakaka ndee kapu na nande omunhu ta dulu okukala mo, kakele ashike kuye. Okwa lombwela nge opo ndi landife po eumbo letu kuye opo a kufe mo eemhepo danyata,” Neis osho a ti ngaho.

Neis okwa ti okwa itavela okulandifa po eumbo laye kuKasume longushu yomiliyona oshinghwanyu nhee koshimaliwa shi fike ashike poN$200 000, shaashi okwa li e muudanekela kutya ote ke mu pa eumbo li wa lidulife pulaye longushu yeemiliyona mbali.

“Okwa heka nge opo ndi tambule ko omalombwelo aye ndee handi shaina omikanda odo kwa li a longekida nakuJosephina Amutse oo kwa li ta vatele mokutula eumbo lange kendina laAmutse,” Osho a ti ngaho.

Omhangu oya ti Amutse okakadona kaKasume.

Oshibofa osho sha kala momhangu yopombda yaVenduka oule weedula omulongo paife, otashi ka twikila noihokolola momafiku 22 Septemba.

Nakuningwa oshihakanwa okwa kalelwa po kuhaende Rachel Mondo omanga omufeekelwa a kalelwa po kuKadhila Amoomo. Kasume okwe likala kutya ke na nande osho a ninga sha puka.

E LI MOLUHEPO
Neis okwa ya moshipundi shetulumuko okudja moshipangelo shaKatutura momudo 2018, ashike ondunge oyo kwa li e na konima ngee a i mopendjela yaye oya ninga ondjodi idjuu okuhangwa.

“Onda kala handi di mokabashu kOkombahe okudja momudo 2021, eshi kwa li nda fiya po Ovenduka. Onda kala nokuxupa mopendjela yepangelo oyo inai wana shaashi oyo handi longifa mokufuta ndokotola,” Osho a ti ngaho.

Okwa ti molwehandu lokukanifa eliko laye, omutima waye owa kala uhe li nawa noha mono outekulu vaye noudjuu.

“Onda kanifa keshe shimwe. Ndokotola okwa ti omutima wange kau li nawa noitau longo nawa,” Osho a ti ngaho.

Ndokotola okwe mu tula ovili opo omutima u dule okulonga nawa. Okwa lila ina, oo a xulifa odula ya dja peedula 94.
OMONAKADONA
Petameko, omonakadona okwa li aanya okufiya po eumbo lofamili.

“Kakwa li konima yefimbo lile manga oshinima shoshikola inashi ningwa, meme okwa li a lombwela nge kutya eumbo letu ola pumbwa okuhakulwa.

Ngee inatu dja mo umwe womufye ota xulifa.

Kasume vati okwe mu lombwela kutya omu na omhepo yomulumenhu a kulupa oyo tai piyaaneke eumbo ndee omhepo oyo otai dulu okutudipaa,” Elizeth osho a ti ngaho.

Kasume okwa vatela ofamili opo i dje mo meumbo omo, ashike Elizeth okwa li aanya ndee ta fininikwa a dje mo.

“Okwa li twa tembukila keumbo li li mOvanahenda. Eshi tu li oko, meme okwa lombwela nge kutya okwa li ta wapaleke eumbo. Inandi mu itavela shaashi ke na nande efiku a ile ko a ka tale kutya oilonga otai longwa ngahelipi yee noho kakwa li eshi noluvala olo tali tulwa kekuma,” Osho a ti ngaho.

Okwa li nda handukila meme neenghono eshi a itavela Kasume,” Elizeth osho a ti ngaho.

“Meme okwa ti Kasume oye ta futu ohiila yetu kOvanahenda, omanga kwa li ta kongo eumbo limwe. . . oto hange ta ti okutuhole neenghono ndee ina hala nande oumwe a fye,” Osho a ti ngaho.

KAKWA LI TA DILAADILA NAWA
Omumwainamati waNeis, Zebedeus Uiseb, okwa ti mumwainakadona kakwa li ta dilaadila nawa eshi a landife po eumbo laye.

“Eshi nda popya naye eshi kwa li nda ka talela po kOvenduka, kakwa li ta monika eudite ko kutya okwa ninga oshinima shakula, okwa li ta kanifa eumbo laye ndee okwa li ashike ta monika a fa ehe na ko nasha,” Uiseb osho a lombwela omhangu yopombada ngaho.

“Okwa li taamene Kasume neenghono,” Osho a ti ngaho.

Uiseb okwa ti kakwa li eshi shi kutya Neis okwa yandja po eumbo laye, fiyo ovakwapata otave mu dengele ve mu lombwele kutya oku na oupyakadi wohiila mOvenduka.

“Okwa li nda kumwa nai ame onda uda nai shaashi eshi ndi shi, oku na eumbo. Onde mu pula. Okwe tu lombwela kutya okwa landifa po eumbo kuKasume,” Osho a ti ngaho.
“Okwa ti okwa li e na oumbada wokukala meumbo omo shaashi ola fingwa,” Osho a ti ngaho.

‘ONGANGA I NA EENGHONO’
Momushangwahokololo waye oo wa yandjwa komhangu yopombada, Kasume okwaamena elando leumbo, ta ti okwe li futa momafiku 29 Auguste 2014.

“Neis okwa li a tokola oshinima eshi kuyeevene monghalo iwa ehe li koshiyodungo mefiku lotete laSeptemba 2014. Ashike muFebuluali 2015, Neis okwa li e ya kwaame nakamusela opo a pule oshimaliwa osho kwa li sha shaala ko shi fike poN$100 000,” Kasume osho a ti ngaho.

Okwa ti ofamili yaNeis opo ya li poshoongalele opo kwa li e mu pa oshimaliwa shi fike poN$30 000.

Momapulaapulo noThe Namibian Omaandaxa, okwa ti okwa vatela Neis shaashi okwa li ashike a fa ina yaye.

“Eumbo laye okwa li li li meengunga ndee ta pula ndi li lande po. Onghee nee, keshe osho ta popi paife kashi shi shoshili,” Osho a ti ngaho.