Onethindi nOnandjokwe nayi ye kOndangwa: Amwele ta ti

OMUNASHIPUNDI gwOshitayi shEhangano lyAanangeshefa sha Ndangwa tate Paavo Amwele nedhina ya tseyika nawa Gondema na oye wo mwene gwoongeshefa dhedhina Cansas City, moshigongi shaatoolinkundana e shi popithile pOndangwa omasiku ga zi ko okwa ti kutya Oshitayi shawo shEhangano lyAanangeshefa sha Ndangwa moshigongi shayo ya li nasho
kuyele nuumvo, oya eta mo edhilaadhilo netokolo kutya oshitopolwa shoka sha Nethindi nOnandjokwe, yi kale ya talika ko pambelelwa ongIitopolwa yOndoolopa ya Ndangwa opo aanangeshefa yomiitopolwa mbyoka iyali ya kale taya tyapula omauwanawa ga fa ngoka taga tyapulwa kaanangeshefa yomOndangwa.

Amwele ta ti iilyo yawo oyindji yi li moshitopowla sha Nethindi nOnandjokwe otayi nanan nondatu uuna tashi ya komauwanawa gaanangeshefa molwashoka oongeshefa dhawo odhi li mehala, ngeno lyondoolopa ya Ndnagwa, ashike nee Onethindi nOnandjokwe sho yi li patopolo lyIikandjohogololo, kayi li kOndoolopa ya Ndangwa na inayi lukwa ngashi Ondangwa ya lukwa (Proclaimed) naanangeshefa mboka ye li mOndangwa y lukwa taya vulu okumona omayakulo giihwapo gopaunangeshefa. Amwele ta ti ngashi uupyakadhi uunene wu newe kaanangeshefa moshitopowla sha Nethindi nOnandjokwe, owo mboka kutya itaya vulu okulongitha omaliko gawo ongomakwashilipaleko mokumona omakwatho goshimaliwa koombaanga nosho tuu kOmahangano galwe gIimaliwa pakulyomukuli, oshoka Onethindi nOnandjokwe, nonando tayi monika ya fa oondoolopa, inayi lukwa ooondoolopa dholela nodhopaveta. ‘Otu wete kutya ngele oshitopolwandoolpopa sha Nethindi nosha Nandjokwe, ngele oye ya kondoolopa ya Ndangwa nokukwatelwa meluko lyondoolopa ya Ndangwa nena otashi ka eta omauwanawa ogendji lela kaanangeshefa yetu mboka ye li miitopolwa mbyoka iyali, na osho nee twa tokola tu lalakanene pethimbo ndika,’ Amwele ta ti ngawo nokugwedha po kutya monkalo moka mu na aanangeshefa yomOnethindi nOnandjokwe nomidhingoloko dhadho ndhoka, kaye na naanaa esiku ya ka hume komeho lyopangeshefa ngele itaya mono ompito ombwanawa yokukala taya mono omakwatho gopashimaliwa pakwashilipaleko kOmahangano gIimaliwa. Amwele ta ti, moshigongi shawo shoka ya li na sho moka mwa popiwa oshinima shika nomwa tokolwa Onethindi nOnandjokwe yi yeb kOndangwa, aanangeshefa yoyene yomiitopolwa moka oyo yene ya eta uudhigu wawo mbuka noya indile kEhangano lyawo li tale oshinima shoka neho etiligane nokuya mo musho meendelelo ngashi tashi vulika.Shoshene Ondangwa pakutopola oshilongo mIitopolwa, oyi li koshitopolwa sha Shana, omanga Onethindi nOnandjokwe, nonando yi li mooha lela dhOndangwa, yi li moshitopolwa sha Shikoto, sho osho nee sha kala shi na uudhigu okutula Onethindi ndjika nOnandjokwe kOndangwa koshitopolwa sha Shana.’Otwa kundana kutya Okomissi yi na sha netopolo lyoshilongo mIitopolwa, oya gandja edhilaadhilo kOmupresidende gwoshilongo kutalululwe etendo lyiitopolwa yimwe nOmalelo goondoolopa, kwiikwatelelwa kOoveta dhOshilongo. Onkee ano tse otu na etegameno ewanawa lela nolya kola kutya oongamba dhondoolopa yaNdangwa otadhi ka tamununwa mo ndele tadhi ka kwatela mo Onethindi nOnandjokwe opo aanangeshefa yetu mboka ye li miitopolwa mbyoka ya kale taya mono nayo omauwanawa ngashi aanangeshefa yakwawo mboka ye li moondoolopa dha lukwa moshilongo.Omusamane Amwele, ngoka a li pamwe nOmunashipundi manga gwEhangano lyAanangeshefa moNooli, tate Josef Endjala (Kapya) noshowo na Amushanga gwOshitayi shEhangano lyAanangeshefa sha Ndangwa tate Mbanda Shilimela, ta ti kutya uudhigu wumwe ye na wo mokati kaanangeshefa yawo owo mboka sho olundji itaya vulu okupewa omikuli notaya indile nee kutya pu totwe Oshiketha shAanangeshefa aashona naapokati meendelelo ngashi tashi vulika opo shi kale tashi kwathele aanangeshefa mbaka pashimaliwa, ano ngashi ngaa sha thanekwa kuuministeli wIipindi nIikwafaabulika omathimbo ga zi ko. ‘Otu wete kutya Ombaanga ndjoka, otayi ka kutha po omaupyakadhi noompumbwe odhindji dhi newe kaanangeshefa aashona naapokati pethimbo ndika,’ Amwele ta ti ngawo nokugwedha po kutya Oshitayi shawo shEhangano lyAanangeshefa mOndangwa otashi longo neitulomo enene omolu eyambulopo lyaanangeshefa yasho. Oshitayi shi li shi ipyakidhila lela nokutala momaudhigu gaanangeshefa yasho nokuyamukula komaindilo gawo nokukembadhala oku ya ningila omauwanawa ngoka taya pula noku ya kwatakanitha kumwe nEhangano lyawo enene.Oshigongi shAatoolinkundana shawo shika, osha li wo sha kalwa komunambelewa Omukuluntupitithi gwEhangano lyAanangeshefa moNamibia,Tarah Shaanika.