Ondonga nUukwanyama onkee taya kondjele omikunda

OPUNIWE epulo enene, tali pula kutya omukunda Omana muuzilo wOshitopowa shoka sha kala hashi ithanwa Owambo kwali,ogu li kohi yElelo lyOndonga nenge okohi yElelo lyUukwanyama.

Epulo ndika olya holoka po sho meti 17 Oktoba 2009, Elenga enene lya Nalusheshete mOndonga moShikoto, tate Eino Shondili Amutenya nookapatashu ke, ya li ya yi komukunda Omana hoka nokukalombwela mwene gwomukunda hoka, kumwe nooyene yomikunda momudhingoloko gwa Mana noshigwana shaahoka,kutya inaya kala we taya lopota kUukwanyama, hoka oyendji yomuyo ya kala haya lopota shito, ihe ya kale taya lopota kElelo lya Ndonga, ano kOndonga molwashoka Omana nomikunda dhi li momudhingoloko gwayo, odhi li mOshitopolwa sha Ndonga, anuwa, ano mOshikandjo shUulenga sha Nalusheshete.Omupopiliko gwElenga enene lya Nalusheshete, tate Kashona Kamalulu ta lombwele The Namibian kutya oshitopolwa shoka sha Mana osha Ndonga na kashi shi shUukwanyama, ngashi oyendji yokoshitopolwa hoka ya kala taya ti. Ta ti oya yile ko nee mewiliko lyElenga lyawo enene lya Nalusheshete tate Shondili, ya tseyithile ooyene yomikunda hoka naalelwa yawo kutya yo oye li koshitopolwa sha Ndonga na, kaye li kombinga yUukwanyama ngaashi ya kala taya dhilaadhila nokukala haya lopota kElelo lyUukwanyama pehala lyokulopota kelelo lyOndonga. Omusamane Malulu ta ti, oya thiga ya gandja elombwelo kooyene yomikunda hoka noshowo kaalelwa yawo kutya okuza meti 30 Oktoba 2009, naya kale taya lopota kOndonga ano kElelo lyOndonga. ‘ Osho twa thiga twe ya lombwela shoka notwiinekela kutya oya uvako elombwelo lyetu notaye ke li gwanitha po,’ Kashona kaMalulu ta ti ngawo.Sho ya yile ko ngeyi ehuliloshiwike ndjoka lyeti 17 Kotoba 2009, okwa li kwa lopotwa mOradio NBC Oshiwambo, kutya Elenga enene Shondili nOokapatashu ye,oya yile kOmana hoka ya ka langeke mwene gwomukunda ngoka omupe,oshinima shoka sha li sha halukitha Elelo lyUukwanyama nokutuma ko aniwa Omukuluntu gwOpilisi okuzilila kOkongo, e ye a tale shoka tashi ningwa ko. Okwa li wo kwa lopotwa kutya Elenga enene Shondili nosheendo she oya li ya tidhwa ko kOmana hoka kaakwashigwana yaahoka molwashoka ita ya tsu kumwe nelombwelo lyawo.Iinima ayihe mbika iyali,kutya oya li ya yi ya ka langeke mwene gwomukunda, noshowo kutya oya tidhwa ko, Kashona ka Malulu okwe shi tsitha oombata.Ta ti shoka hasho nande. Kaya li ya ka langeka mwene gwomukunda hoka na inaya tidhwa ko. Oya ninga iigongi yawo nombili nokulombwela ooyene yomikunda hoka naalelwa yawo omulandu ngoka gu li po no ye na okulandula, ano ngoka gwokulopota kElelo lyOndonga, ndele haku lyUukwanyama. Oshinima shekondjelo lyomikunda koshitopolwa hoka,pokati kElelo lyOndonga nolyUukwanyama,oshinima sha za ngaa nee nale. Oomvula hamano lwaampoka dha pita po, Elelo lyOndonga olye kiidhengele mEkoka momudhingoloko gwa Omana moka, tali ti kutya omukunda Ekoka nomikunda dhomomudhingoloko ogu li kOndonga, onkee mwene gwomukunda Ekoka nomomudhingoloko oye na okwiilopota kOndonga,aniwa. Aakalimo yaahoka oya li ya geya nokutidha ko aakalelipo yElelo lyOndonga mboka ya yile ko. Mu Maalitsa 2004, Ombelewa yOmupresidende, pethimbo ndyoka, Omupresidende Sam Nujoma, oya etele pamwe Omukwaniilwa gwOndonga tatekulu Immanuel Kauluma Elifas nOmukwaniilwa gwUukwanyama pethimbo ndyoka nakusa tatekulu Kornelius Shelungu, ya shaine kutya Ongamba yOndonga nUukwanyama nayi pite Oshuudhiya muuzilo wOndonga nUukwanyama pokati. Oshitopolwa shuumbugantu tashi ningi Ondonga naashoka shUumbangalantu tashi ningi Uukwanyama. Aakwaniilwa yOmalelo ngaka gaali oya li nee ya koleke shika. Omukwaniilwa gwOndonga tatekulu Kauluma Elifas okwa li pamwe nOmunashipundi gwElelo lyOndonga tatekulu Peter Kauluma, omanga nakusa Omukwaniilwa tatekulu Kornelius Shelungu a li nElenga lye enene nakusa Victor Weyulu. Ashike, nani osha fa sha li shi li ngeyi kutya, Aakwaniilwa, unene tuu gwUukwanyama, kaya li ya lombwela Omalelo gawo nawa oshinima shika sheshaino lyOngamba,oshoka konima ashike yeshaino ndika, Elelo lyUukwanyama olya ka gongala nokugandja omushangwa gwalyo gu li ompinge neshaino lyongamba ndjika. Oshinima shongamba ndjika momumvo 2004,osha li shi na okukundathanwa,ashike oonkundathana odha tsilikilwe omolu omahogololo gOpaupresidende nogOshigongi shOpashigwana ngoka ga ningilwe omvula ndjoka. Otwa kundana kutya oshiwike sha zi ko, Elelo lyUukwanyama, ndyoka natango kali uvitile ombili edhilaadhilo netokolo lyElelo lyOndonga okukutha ko omikunda dha tumbulwa metetekelo, olya gongalele nokukundathana oshinima shika muule, nolya ningi etokolo kutya nali shi ethe manga sigo omahogololo gOpaupresidende nogOshigongi shOpashigwana ngoka taga ka kala ko eti 27 neti 28 Novemba 2009, taga hulu, opo ihe nawa ya ye moonkundathana dhoshinima shika shOongamba yomuuzilo pokati kOndonga nUukwanyama.