Ondjindikila yelanditho lyosamende

ONDJINDIKILA yokulanditha osamende okuza moNamibia okuya koAngola otadhi ka kuthwapo mbala pehulilo lyonuumvo.

Onkene ofabulika yosamende yOhorongo oya tegelelwa ishewe okutameka okulanditha osamende koAngola pehulilo lyonuumvo. Moonkundathana na Nampa metiyali oshiwike shika omuwiliki omukuluntu gwa Ohorongo Cement, Hans-Wilhelm Schute okwa ti ondjindikila ndjoka oye yaadha ohaluka, unene tuu sho yaadhika ashike opo ya tameke okulanditha osamende koshilongo shokuumbangalantu. Okwa ti oondjindikila odha ehameke elanditho lyehangano, ndele onkundana ombwanawa oondjoka kutya iilongo mbika iyali oya kundathana noya uvathana kutya osamende otayi ka landithwa ishewe koAngola okuya pehulilo lyonuumvo.Schutte okwa ti ethaneko lyawo okwa li lyokulanditha osamende manga muumbugantu wAngola okuza moNamibia, omanga ehangano lye inaali dhiladhila okulanditha kiilongo yilwe muumbugantu waAfrica. Ofabulika yOhorongo oya tegelelwa okulonga osamende yootona omayovi oamthele 700 000 komumvo ootona 250 000 sigo 300 000 odha tegelelwa okulandithwa muumbugantu waAngola. Schute okwa ti okuna etegameno kutya elanditho lyosamande ota li ka tameka mbala nonawa. Mu Juni nuumvo Oholomende yAngola oya indike osamende ya Namibia yi landithwe moAngola, unene ndjoka hayi longithwa mokutunga. Epangelo lya Angola olya ti oondjindikila ndhika odhaningilwa osamende ndjoka oshoka oludhi nduka olulimo olundji moshilongo shoka. Ndele omaludhi galwe gosamende ngaashi ndjoka ha yi longithwa okutulamo uuteelesa pomalupanda otayi tuminwa natango koshilongo shoka. Etseyitho lyoondjikila ndhika olya adha aahingi yamwe yomatoloko ngoka ga li ga humbata osamende okuya koAngola inaayiilongekidha. Ehangano lyOhorongo olya tameke oku tumina osamende koRepbulika Yuudemokoli ya Kongo, hoka ya thaneka okulanditha ootona omayovi 18 000. Oootona dhotango dhosamende ndjika odha tuminwa nale ko DRC nomulongelo omukwawo galandulako ogwa tuminwa nale koshilongo hoka oshiwike shika.Okwa ti opena woo omathaneko okulanditha osamende koBotswana, ko Zimbabwe, no Zambia. Ohorongo uuna tayi longo shuudha otayi kala naaniilonga yeli omathele 300 omanga pethimbo ndika oyina aaniilonga 270 taya longo miilonga tayi kalele.