Ondhila onene ya France ya kana

OKUNIWE uumbanda kutya ondhila onene yOkampani yOodhila ya France yonomola 447, oya gwile mefuta lya Atlantic mOmaandaha, konima sho momashina gawo mwa holoka omapuko manga ya li tayi tuka moshikungulu oshinene.

Okampani ya Air France oya ti kutya ondhila ndika yo Airbus A330-200, otashi vulika ya dhengwa kolwaahi nokugwile mefuta.
Omatanga gaakwiita yomombanda lya France nolyaBrazil, oga li ga tumu aakwiita ya ka konga ondhila ndjika.
Osha kolekwa kutya mondhila ndjika omwa li mu na aantu ye li 228 na ngele nee aantu ayehe mbaka oya sa, shika oshi li oshiponga oshinene tashi monika ku Air France mondjokonona ye. Konima yoowilie ne sho aniwa sho ya tuka mu Rio de Janeiro mu Brazil yu uka ku France, ondhila ndjika oya li ya lopota mokapale moka ya tuka kutya oyi na epuko momalusheno na shika osha li potundi onti: 02h14 , Omukuluntuwiliki gwa Air France Henri Gourgeon, osho a lombwele aanankundana pokapale koondhila ka Charles de Gaulle mOmaandaha.
Omukuluntu gwomakwathano gwa Air France, Francoise Brousse, okwa ti yo oye wete kutya odhila ndjika oyi na okulala ya kwatwa kolwaadhi. ‘Ondhila ndjika oya li tayi tuka moshitopolwa mu na oshikungulu oshinene, shoka sha li she yi shikashika noonkondo shoka nee ngiika osho sha eta uupyakdhi,’ Brouse osho a popi ngaaka.
Mondhila ndjika omwa li aalumentu ye li 126, aakiintu ye li 82, aanona yaheyali nokahanona kamwe. Mboka ya li ye yi li koluuli oya li ye li yatatu omanga aayakuli yaafaalelwa ye li omugoyi.