Ondawu ya kelela ondhila ya Air Namibia yi ye koNooli ongula yohela

OSHITSIMA, ano Ondau ndjoka yi iteyele muumbangalantu okupendukila ongula yohela, kaya li ike ya eta uutalala, ashike oya kelele wo noondhila dhokuhumbata aayendindjila, unene tuu ndjoka ya Air Namibia, dhi kale inadhi thika koNooli ongula yohela, shoka sha eta aayendindjila ya kale ya tegelela ethimbo ele pOkapale koondhila ka Ndangwa nokukala ya tokelwa kiigongi nokwaambyoka ya li taye kiipyakidhila nayo kOvenduka nosho tuu pondje yOshitopolwa shokoNooli.

Ookastoma dha Air Namibia ndhoka dha li dhe ya kOkapale koondhila kokOndangwa ongula yohela ya ye nondhila ya Air Namibia kOvenduka okuza kOndangwa, oya kala ya geya sho ya uvu kutya ondhila ya Air Namibia itayi thiki ko kOndangwa ongula yohela.Ya lombwelwa kOmkukuluntu gwEhangano lyetuko lyoondhila dha Air Namibia poNdangwa mpoka kutya, omuhingi nenge aahingi yondhila ya Air Namibia oya tseyitha kutya yo kOndangwa ita ye ya ko manga, otaya hulile ashike mOshomeya nokushuna kOvenduka, oshoka kOndangwa itaya vulu okuthika ko omolu ombepo kayi li nawa.Nande ongawo aayendindhila mbaka, oya kala taya ti kutya shoka hasho nande, oshoka halo lwotango Air Namibia ta tokelitha aantu pokapale kopOndangwa.’Ngaye onda li ndi na okukala mOvenduka manga ondatu yomutenya nena inayi dhenga opo ndi kiilongekidhe okuya nondhila koJohannesburg koSouth Africa, oshoka ondi li molweendo okuya pondje yoshilongo. Ihe sigo oompaka ondi li pOkapale ka Ndangwa, molwashoka ondhila ya Air Namibia ndjoka nda uvathana nayo tayi yi nangaye okuza pokapale ka Ndangwa okuya kOvenduka, sigo oompaka inayi thika, notwa lombwelwa nokuli kutya itayi ya, oya hulila ashike mOshomeya nokushuna. Oshinima shika shokutokitha aantu kashi li nawa nande, na Air Namibia okwe shi igilila noonkondo, oshoka halo lwotango ta tokelitha aantu ngeyi,’Chris Kantewa ta ti ngawo a geela Air Namibia noonkondo. Ta gwedha po ta ti oyendji yomaanangeshefa nosho tuu mboka ya li ye na oku ka kala miigongi yawo kOvenduka nenge okukaninga oombisinisa dhawo hoka nosho tuu, oya shuna ashike komagumbo nenge koombelewa dhawo kOshakati, kOngwediva, kOndangwa nosho tuu molwashoka oya tokelithwa ku Air Namibia.Mokuninga ekwatathano nOmunambelewa gwOshikondo shOmatuko gOondhila dha Air Namibia meni lyoshilongo, omusamane Abraham Nasab, okwa ti kutya oshinima shondhila ya Air Namibia, inayi thika kOndangwa ongula yohela, kasha li oshiningilawina, ihe osha etwa konkalo yombepo yoshitsima, ano yOndau ndjoka ya li yi iteyela moNooli okupendukila ongula yohela.Ta ti ondhila yoyene, oya li ngeno yi na okuthika pokapale kOndangwa petata lyomugoyi ngashi shito, ashike omolu onkalo yombepo ya piti kayi li nawa, yi na ondau nomuntu kuwete ko we hoka wa thinda, inayi vula okuthika ko kOndangwa pethimbo ndjoka ngashi shito. Nasab ta ti olweendo lwokOndangwa olwa kalekwa sigo opombali yomutenya ohela ndjoka. Ano, ya kalekwa noowili ntano hamano lwaampoka. Otwa ka kundana kutya osho ngaa ye ke ya shili, ashike nee oyendji oya y0onenwa omalandulathano, omaipyakidhilo noshowo iigongi yawo kOvenduka nosho tuu.Onkalo yOndau moNooli, okupendukila ohela, oya li ya kumitha oyendji yomoNooli. Yamwe otaya ti inaye shi mona nale. Aanona yOosikola dhIikunino, pomahala gamwe, oya li nokuli ya lombwelwa kaya ye kOosikola dhawo ndhoka ongula yohela molwashoka otashi vulika ya ka kane molu ondau ndjoka. ‘Ano oku li ngiini ngeyin nena? aanona yamwe mOngwediva taya pula sho ya pita pondje ya ye kOsikola. Aahingi yiihauto okuya kiilonga nokomahala gi ili nogi ili moNooli, ongula yohela oya ende noolamba dhiihauto yawo dha tema opo yi imone, kayi idhenge mumwe nokweeta iiponga. Nande ongawo ombepo yOndau ndjika, nonando ya eta uutalala wo, inayi kala ko ethimbo ele, oya shuna nonkalo yombepo oya shuna ko ishewe ngaashi shito.