Ondando yuumbesa ya thigitha po oyendji

AANTU oyendji mboka haya kala kiitopolwa yokuushimba mboka opo nee taya shuna okuza kOnooli, itaya ka thika kiitopolwa yawo pethimbo omolwa oondando dhuumbesa dhoka dha londekwa (shaali paveta) dhoka itaya vulu okufuta.

Ongundu onene yaantu otayi monika pOkatana Service mOshakati nopomahala ogendji moshilongo,mpoka taya hokolola kutya oya ningi omasiku gaali nenge gatatu.
Shika oshi li ngaaka molwashoka aahingu yuumbesa otaye ya pula ondando yi li pombanda shaa li paveta, ndjoka itaya vulu okufuta
Yamwe oya hokolola kutya opu na aanuumbesa yamwe taye yapula ya fute N$200 ngele taya yi kOvenduka, Swakopmund na Mbaye inamu kwatelwa omitsalo dhawo.
Oya pula ehangano lyOombesa nOotaxi mu Namibia li ninge po sha.
Kepulo, Omupresidende gwa Nabta Magnus Nangombwe okwa ti oshinima shika osha puka.
‘Opu na oondando dhoka tu uvathana nEpangelo okuziilila mUuministeli wIiyenditho nOmakwatathano na Nabta.
Ngele opu na ngoka ta futitha shimwe shi ili, ano ota yaka oshigwana na oku na okulopotwa kOpolisi opo a katukilwe onkatu. Ngele owa yugwa momukalo nguka na ou wete kutya uutheemba woye owa yonwa,ka lopote kOpolisi,’ Nangombe ta popi ngaaka.
Nabta oku na omahala gokulondekela oombesa mOvenduka, Swakopmund, Rundu na Katima Mulilo, ngoka Nangombe a hokolola kutya omu na elandulathano. Nabta oha gandja woo omageelo kaanuumbesa mboka taya yono oompango, shoka hashi eta ya tidhwe po pomahala ngoka.
‘Ondi na ekumagidho kooyene yuumbesa ya kunkilile aahingi yawo kutya inaya yeka we oshigwana momukalo nguka. Ongeshefa ndjika oya thikama po koshigwana nongele ka oshigwana ka shi po, ongeshefa ndjika nayo itayi kala po.Nando ku na aantu oyendji ya pumbwa oolefa, shika hasho tashi hwahwameke elondeko lyoondando lyaali pauyuuki, onkee natu yakuleni oshigwana moshili,’ Nangombe ta kunkilile.
Okwa lombwele wo aakwashigwana mboka ye li moondoolopa moka Omalelo ina ga gandja natango omahala gokulondekela uumbesa momake ga Nabta, ya tameke okuga thiminika ge shi ninge meendelelo opo omukundu nguka gu kandulwepo.
Pethimbo lyo kuya komanyanyangidho, Omupopiliko gwOpolisi ya Shana ina vula okumonika a gandje okomenda koshinima shaantu taya futithwa oshimaliwa sha pitilila koombesa.