Ondando yomahooli ota yi ka shuna pevi mu Juni

AALONGITHI yomahooli oya tegelela okafudhepo moondando sho ngiika ondando yomahooli tashi vulika ya tegelelwa yi ka shune pevi omwedhi nguka okuza tuu nkene ya kala ta yi ende yuuka pombanda, nokwaadha pondondo yopombanda omwedhi gwa yi.

Oondando dhomaludhi agehe gomahooli odha thikama konyala poodola omulongo noosenda dhi vule omilongo ntano.Oondando dhomahooli moSouth Africa odha shunithwa pevi noosenda 55 molitera oshiwike shayi omanga ndjoka yodiesela ya yi pevi noosenda 25 molitera. Pahapu dhomupekaapeki mehangano lya Simonis Storm Securities, Rome Mostert, ondando yomahooli oya shuna pevi nooperesenda 11,7 okuza tuu nkene Namibia a li lundulula ondando yomahooli. Pethimbo olyo tuu ndyoka ongushu yoranda oku yeleka nodolar yAmerica oya yi pevi nooperesenda 2,9, na osha elanditho lyeetamo iimaliwa oyindji okuyeleka naambyoka ya zimo. Pethimbo olyo tuu ndyoka omahooli muuyuni oga ninga ogendji, molwaashoka, Saudi Arabia ota kutha omahooli moompungulilo dhe okuudhitha ompumbwe ndjoka yeetwapo koondjindikila tadhi ningilwa Iran kuukumwe wa Europa noku America. Epulo lyomahooli okuza kiilongo ya putuka ngaashi Europa olya ya pevi omolwa omahupilo giilongo mbyoka taga ende kashona. Onkene ondando yondoloma yimwe yomahooli inaaga dhindwa oya gu okuza poodola dhAmerica 113 okuya poodola odho tuu ndhoka 97,40. Mosetert okwa tengeneke kutya ondando yomahooli otashi vulika yi shune pevi noosenda 45 molitera omanga ondando yodiesela ota yi kala oshona. Okwa tengeneke odiesela ta yi ka gwa pevi noosenda tashi vulika dhili 30 molitera. Mostert okwa ti eyopevi lyomahooli ota li ka ukitha omuthika gwengushuluko pevi, noshowo omuthika gwiihohela mbyoka aali yomikuli haya kutha koombaanga.Mostert okwiitaala kutya otashi vulika ondando yomahooli yi shune pevi ishewe moomwedhi tadhi landula, unene tuu ngele oshikumungu shiikwalute sha Iran osha potokononwa pambili.