Ondando yomahooli ota yi gwedhwa ishewe

ONDANDO yomahooli ota yi gwedhwa noosenda omilongo mbali nantano molitera oku za metitatu lyoshiwike shika. Ngele elondo lyoondando ndika olya yi miilonga, shika ota shi kala oshikando oshitihamano omahooli taga londo oku za petameko lyomumvo ngu.

Odisela ota yi londo noosenda omilongo mbali molitera, na shika osho oshikando oshitine sho ondando yodisela ta yi londo nuumvo.Egwedhelo lyongashingeyi ota li ti olitera yimwe yomahooli gaziza(unleaded) ota yi pula oodola 7,04 mOmbaye omanga ondando yomahooli omatiligane ta yi gu oodola 6,96, nodisela ota yi ka futilwa oodola 6,93 molitera yimwe moshilando shokomunkulofuta.MoVenduka ondando yomahooli omaziza ota yi kala oodola 7,25 omanga ondando yomahooli omatiligane ta yi kala oodola 7,17 no disela otayi kotha oodola 7,14.Aalongithi yomahooli miilando shaShakati, Rundu na Katima Mulilo ota ya ka futa oodola 7,32 momahooli gaziza, oodola 7,24 momahooli omatiligane . Odisela ota yi, ya pula oodola 7,22 moKatima Mulilo noRundu ndele ota yi ka kotha Aashakati oodola 7,21 olitera.Aaniihauto ota ya ka futa oodola 7, 41 molitera yomahooli gaziza poKeetmanshoop, oodola 7, 33 olitera yomahooli omatiligane noodola 7,31 oliter yimwe yodisela.PoNoordoewer aahingi yii enditho otaya ka futa oodola 7,49 molitera yomahooli gaziza, oodola 7,41 olitera yomahooli omatiligane noodola 7,39 molitera yimwe yodisela.Ominista yOomina nIikwankondo, omusamane ,Erkki Nghimtina okwa koleke kutya oondando ndhika oompe ota dhi yi miilonga mo 16 Septemba 2009.Nghimtina okwa ti ondjele yetaambathano pokati kodola yaNamibia naandjoka ya Amerika omwedhi gwa ziko oyo ya gu pevi omanga ondando yondoloma yimwe yomahooli inaa ga dhindwa ya li lwo poodola dhAmerika 75, sha hala okutya ondando yomahooli inaa ga dhindwa ota yi ende ta yi londo nenge ethimbo limwe ta yi gu pevi.’Omalanditho giikwamahooli muuyuni otaga nwethwamo kehilathano pokati konkalo yehwepopalo lyomahupilo muuyuni kombinga yimwe noshowo enkundipalo melando lyomahooli inaa ga dhindwa muuyuni kombinga onkwawo’, Nghimtina ta ti.Okwa ti Uuministeli we ota wu kala noku tala nkene omalanditho gomahooli nongushu yiimaliwa yi li, nongele ondando yomahooli nenge ondjele yetaambathano oya opala, uuwanawa mbuka ota u ka pewa aalandi yomahooli.