Ondama ya Calueque tayi ka opalekwa nokulongwa mbala

ONDAMA onene yomeya ya Calueque kumwe nosasiona yolusheno muumbugantu wa Angola, ndjoka ya mbomenwepo nokuyonagulwa po pethimbo lyiita yekondjelomanguluko lya Namibia, otayi ka tungululwa nokuwapalekululwa muule wethimbo tuuka.

Shika osha popilwe moshigongi sha li mOndangwa pokati kEpangelo lya Namibia na Angola, moka Namibia a li a kalelwa po kOministeli yuunamapya, Omeya nIihwa, John Mutorwa noshowo kOministeli yOomina nIikwamalusheno, Isak Katali, omanga Angola a li a kalelwapo kOminista yOmeya nOonkondo dhOlusheno, Joao da Silva Borges.Moshigongi shoka, sha li wo sha kalwa ku Gavena gwOshana, Klemens Kashuupulwa na Gavena yOprovinsi ya Cunene muumbugantu waAngola, Antonio Didalelwa, no kaanambelewa yiikondo mbyoka itatu.Omapangelo ngaka gaali oga ti oga ndhindhilika esimano nedhanonkandangala lyOndama nosasiona yOlusheno ya Calueque, noga tokola kutya Ondama ndjoka kumwe nOsasiona yolusheno yi tungululwe noku wapalekululwa meendelelo ngashi tashi vulika opo iigwana mbika iyali yi mone omeya ga yela noshowo olusheno okuzilila moonzo dhawo ndhika mbali, mokumona olusheno, nomeya ga yela noshowo mokutekela iikunino yawo, ya mone iipalutha, ngashi unene yiihape niiyimati tayi tungu. Katali ta ti etungululo netulo nawa miilonga lyOndama yomeya nOsasiona yOlusheno po Calueque, otashi ka eta uuwanawa oundji kaakalimo yiilongo mbika iyali. Oshoka shampa ashike osasiona yolusheno ko Calueque hoka ya tungululwa nokupangelwa nawa nena otashi ka eta mpoka omeya ga vule okupombwa nawa okuza mOndama ndjoka ya Calueque ga thinda moshigwana. Katali okwa ti wo kutya otapu ka tungwa ondjila ombwanawa ya za ko Calueque mo Angola ya thinda pOmweelo gwokoongamba dha Namibia na Angola gwa Mahenene, omanga kuniwe wo edhilaadhilo lyokugandja omeya gayela kAangola mboka ye li pokati ka Calueque nomweelo gwa Mahenene.Otashi vulika wo omukanka ngoka gwa za ko Calueque gwa thinda kOshakati, okupita mUukolonkadhi, mOmbalantu nomUukwambi, gu ka tulwe kohi yevi. Ano gu kale inagu ekama we ngashi gu li pethimbo ndika. Minista Katali ta ti wo kutya otaku ka longekidhwa egandjo lyomeya li li hwepo okuza mOshakati okuya kOndjiva okupitila moSanta Clara nOnamacunde muumbugantu wa Angola.Taku ka ningwa wo Oshidhinditho oshinene shomeya muumbugantu waAngola moka, opo oshigwana shomOshitopolwa shoka shi mone omeya ga yela. Katali ota ti nee kutya omadhilaadhilo agehe ngoka oga etelwe po moshigongi sha ningilwe omathimbo ga zi ko, pokati kEpangelo lya Angola na Namibia nokwa gandjelwe elombwelo kutya omadhilaadhilo nomatokolo ngoka ga ye miilonga meendelelo ngashi tashi vulika, oshoka oshigwana osha pumbwa omeya ga yela nolusheno talu ende nawa ethimbo alihe.Ondama ya Gove muumbugantu wa Angola nayo wo otayi ka opalekwa opo yi vule okugandja omeya ga gwana kosaisona yOlusheno po Ruacana, yi vule okugandja olusheno ku Namibia , unene ko Nooli noshowo kuumbugantu wa Angola moshitopolwa sha Cunene.Pethimbo lyoshigongi shika, Oministeli Mutorwa okwa pandula ekwatathano ewanawa pokati kiilongo mbika.