Onawa Mills oya li yi na uupyakadhi

OKAMPANI yedhina Onawa Mills, yimwe yomOokampani dhoka dha pewa ookondaraka yokufala iikulya yoshikukuta koshitopolwa sha Hangwena,Oshana nOmusati, oya ti kutya otayi ka tameka okuninga ngaaka muule wethimbo efupi.

Okampani ndjika yokOmbalantu oya li ya pewa okondaraka ndjika mu Oktoba yi fale ootona 3 917 dhuushano wuusila wepungu koshitopolwa sha Hangwena, ihe sigo oompaka oya fala ko ashike ootona 45 dhomootona dhika.
Kepulo kutya uupyakadhi ou li peni, Omukuluntuwiliki gwOkampani ndjika Paulina Haindongo okwa ti Okampani yawo oya li ya mono omaupyakadhi gopautekenika, ihe ngashiingeyi owa kandulwa po na otaya ka tameke iilonga yawo muule wethimbo efupi.
Nande ongaaka, Haindongo ina ya muule kutya uupyakadhi mboka wa li wa shike naanaa. Okwa popi ashike kutya, ‘ngashiingeyi ota tu na ota tu ka fala (uusila) mbala.’
Otendela yiilonga mbika otayi hulu mu Maalitsa. Omolu Okampani ndjika itayi shi enditha nawa miilonga yawo, Oshikondo shOmakwathelo gOpaulumompumwe mOmbelewa yOmuprimaminista, oya li ya ningi eindilo kOkampani ya Namib Mills na Kavango Mills kehe yimwe ya fale oometrik-tona dhi li 150 dhuushano wuusila wepuninga koshitopolwa sha Hangwena na Musati. Omuwiliki gwOpevi gwOshikondo shika, Gabriel Kangowa, oshiwike shika okwa li a popi kutya oshinima shefalo lyiikulya tali shongola mOnooli, otashi piyaganeke oonkambadhala dhEpangelo okugandja iikulya yoshikukuta koshigwana shoka she yi pumbwa.
Kangowa okwa ti nonande egandjo lyomagadhi gokuteleka otali ende nawa, egandjo lyuushako wuusila wepungu noondooha dhoohi ita li ende nawa. Ihe aniwa Okampani ya Onawa Mills oyi li konima noonkondo nomafalo giikulya.
Moshitopolwa sha Shana, Namib Mills otashi enditha nawa lela. Omjukuluntuwiliki gwOpevi mOshikondo shi na sha nomakwathele gaantu komikunda mElelo lyoshitopolwa sha Hangwena, Natalia Ndaitwah okwa ti oopelesenda 80 dhaantu moshitopolwa shawo odha tala miikulya yoshikukuta. Okwa ti onkalo ndjika oya etwa po kefundja noshikukuta shomumvo gwa zi ko, unene tuu momahala gokuuninginino woshitopolwa.
Okwa ti Eenhana, Engela,Oshikango,Omulonga, Ohangwena,Endola, Ondobe nOngenga, odho omikunda dhoka dha gumwa noonkondo koshikukuta. Kangowa okwa ti Ombelewa yawo oya tumina Onawa Mills yi endeleleke iilonga yawo yokugandja iikulya yoshikukuta.