Omvula otashi vulika yi ka londeka omukithi gwOkolela

JOHANNESBURG – Omvula yopothinge ndjoka ya tameka okuloka mu Zimbabwe, otashi vulika yi ka londeke omukithi gwOkolela, ngoka gwa dhipaga aantu ya konda po 1 600 moshilongo shika okutameka mu Auguste 2008.

Shika osha popiwa kehangano lyOmushigankano Omutiligane lyOpaigwana mEtitano. Ehangano ndika olya ti olya tegelela uupyakadhi uunene u ka holoke moshilongo shika, tali ti kutya efundja ndyoka lya tegelelwa li ka holoke moshilongo, otali ka indika aaniilonga momahangano omakwathele okuya komaghala hoka ku na omukithi nguka.
Efundja ndika okwa tegelelwa wo li ka yonagula omapya moshilongo shika, shoka shi li nale mompumbwe yiikulya. ‘Tse ota tu ilongekidhile ashike uupyakadhi,’ Omukuluntu gwiilonga yehangano ndika moshitopolwa shAafrika lyUumbugantu, Francoise Le Goff, osho a popi ngaaka. Goff opo ashike a galuka ku Zimbabwe, a li a ka tala kutya onkalo oyi li ngiini.
Ehangano li na sha nuundjolowele lyIigwanahangano/World Health Organisation (WHO) olya tseyitha kutya aantu ye li 1 608 oya si komukithi gwOkolela maantu ye li 30 365 mboka kwa lopotwa ya monika omukithi nguka okuza mu Auguste 2008.
Ehangano ndika olya popi kutya aantu ya thika po 60 000 otaya ka kwatwa komukithi nguka, manga inagu kwatwa moshipala.
Aaleli yiilongo yAaEuropa nosho wo yamwe yiilongo yAafrika, ya haluka komwaalu omunene gwaantu mboka ya si komukithi nguka, omathimbo ga zi ko oya li ningi eindilo kOmupresidende Robert Mugabe na thige po oshipundi, omanga aaleli aakuluntu yAafrika ngashi Omuprimaminista gwa Kenya Raila Odinga, a li a popi kutya Mugabe na kuthwe ko koshipundi paenkondo dhopaukwiita, ngele ina hala okuza ko ye mwene. Ihe Ehangano lyUukumwe wAafrika, lya kwatelwa komeho ku South Afrika (ngoka oye li oshilongo oshinankondo paliko mu Afrika lyUumbugantu) oya tindi eindilo kutha Mugabe na umbwe ko koshipundi, tali ti kutya osheetwapo kutya mu Zimbabwe namu etwe Epangelo lyopaukumwe ogwo omukalo gu li nawa okuhulitha po omaupyakadhio gopaliko nogopapolitika, ngoka taga inyenge moshilongo shika. – ZimOnline