Omvula onene yaloka moNooli nOosikola dhimwe dha pata

OMVULA onene ya loka muumbangalantu wopokati oshiwike sha zi ko, oya eta mpoka Oosikola dhimwe, unene tuu mOmusati dhi pate nadhimwe dhi tameke okuninga oothaila poosikola opo dhi shiwe okutsikila nelongo.

Oosikola dhimwe odha pata ashike esiku dha tameka, ano meti 17 Januari 2012 sho esiku ndyoka kwa tameke okulokwa noonkondo.Omulongisikola kOsikola Ouvale mOshikandjohogololo sha Kalongo mOshitopolwa sha Musati tate Helao Frans, okwa lombwela The Namibian kutya Osikola yawo oyi li moshiponga oshinene shomeya naalongi kaya li we taya vulu okuya ko niihauto ihayi nana akuhe, omanga aanona taya ende nokutaaguluka omeya omale okuya nokuza kOsikola hoka. Helao ta ti Oosikola oonkwawo momudhingoloko, ngashi Onembamba nOshaluwata nadho odhi li moshiponga shomeya.Pokati mpoka, The Namibian okwa kundana kutya omolu omvula onene ya loka mOshitopolwa sha Musati, Oosikola dhimwe mOshitopolwa shoka, odha pata nale nokuli, dha tegelela omvula yi sheke nomeya ga ninge omashona opo aanona naalongi ya vule oku ga taaguluka nokuthika kOosikola nenge okuza ko.Oosikola dhimwe dha pata hoka, ongashi Okapopo, Dr Kleopas Dumeni, Okanimekwa, Jerry Ekandjo, Ompaya nOshitudha omanga mwaashoka sha Hangwena mwa pata Oosikola ngashi, Ehafo, Onanghulo, nOshitambi omanga Oosikola ndhoka dhi li mOshikandjolongo sha Ndobe, Endola, Ohangwena nOngha nadho wo dhi li moshiponga oshinene shomeya.Shoshene omeya ngaka kage shi gefundja enene ndyoka hali zilile kEvale muumbugantu waAngola, ihe olyefundja lyomeni lya Namibia, ano lyomOshitopolwa shomoNooli, ndyoka lya etwa komvula onene ya loko pethimbo limwe, moshikando shotango shayo shokuloka. Opuniwe nee omaipulo omanene kutya ngele oya li ye ya noshilundo ngeyi moshikando shotango, moshikando oshitiyali moka hayi loko unenenene, ano mu Februari na Maalitsa moka, otashi ka kala ngiini ando.Omapya nomagumbo ogendji moNooli pethimbo ndika, oge li nale kohi yomeya. Unene tuu mOondoolopa ngashi Oshakati, Ondangwa, Outapi nosho tuu notaku kongelwa aakalimo yamwe oothaila dhokukala mo, oshoka mpoka ya kala itaya vulu we okukala po omolu omeya ngoka ga mbandukila mpoka.Omapaya ogendji oge li nale kohi yomeya niilya oyindji otayi tameke nale okuyonuuka, okusa nosho tuu. Openiwe lela uumbanda kutya otaku ka kala tuu eteyo ewanawa kwaamboka ye li miitopolwa ya nika efundja, ngele osho tayi loko ngeyi.Ondjila noontopa dhimwe odha yonagulwa po nale komeya, shoka sha eta uudhigu momalweendo pokati komikunda nomikunda noshowo kIikandjohogololo nIitopolwa. Oositola, Oondingosho nOomaraka, odhi li nale kohi yomeya nAanangeshefa oya tameka okukanitha nale oshindji pethimbo ndika. Oositola ngashi dhopOshitutuma mpoka noshowo pOnandjaba mOkalongo naandhoka dhopOnambelela mOmbalantu nadhilwe wo odhi li nale kohi yomeya noyendji otaya kondjo nokututila po omavi pamwe hwepo.Mehuliloshiwike ndika lya zi ko, oya kala ya mwena po manga, noyendji otaya ti kutya oya ka fudha po kashona opo ihe yi ka galuke noshilundo mOmwedhi tagu ya.