OSHIZEMO shomakonaakono gomukiintu gomimvo 30 gomoShiwakopo okutala ngele okuna ombuto yomukithi gocoronavirus otashi ka pitithwa mEtine lyoshiwike shika.
Omukiintu ngoka okwa li a taambelwa moombete dhoshipangelo shaShiwakopo moshitopolwa shErongo mehuliloshiwike konima sho a li a monika omandhindhiliko ga fa naana gaamboka ya kwatwa kombuto yocoronavirus ndjoka hayi taandele mbala.
Minista gUundjolowele Kalumbi Shangula mOlyomakaya kongulohi okwa li a lombwele oThe Namibian kutya omuvu ngoka okwa li a yi koshipangelo mEtitano te ehama omutse, e na eshikisha nomukolo, ashike ka li nande e na uupyu wa londa.
Minista okwa ti omuvu ngoka okwa li i ikalekelwa, molwaashoka otaku fekelwa kutya okuna ombuto ndjoka yocoronavirus, ashike omandhindiliko ngoka e na inaga fa agehe ngoka gombuto yocoronavirus.
Okwa ti konima sho omuvu ngoka a li a konaakonwa, okwa li a fekelwa e na ombuto yocoronavirus nokwa li a ningilwa omakonaakono galwe i ikalekelwa.
“Otwa pumbwa uuyelele wu ukilila kombinga yomuvu ngoka opo ashike tu ninge omakonaakono ngoka ge li mondjila. Oshinima shoka ngashingeyi oshi li kohi yetonatelo notashi ningilwa omakonaakono,” osho a popi ngaaka.
Shangula okwa ti mEtine lyoshiwike shika oshigwana otashi kala shu uva oshizemo shomakonaakono ngoka taga ningwa kombinga yomuvu ngoka.
Okwa popi kutya omuvu ngoka okwa li a pitile mo-Sydney, mo-Australia, nomoNamibia okwa li e ya mo okupitila pokapale koondhila kopashigwana kaHosea Hosea Kutako, mpoka a li a konaakonwa nokumonika kutya ka li e na uupyakadhi wa sha.
Omuvu ngoka okwa li a kala moKhomasdal mOvenduka nokonima okwa li a yi kOshiwakopo mEtine (lyomasiku 30 gaJanuali).
“Uuyelele okuza komuvu ngoka, okwa ti okwa li mondhila naantu ya za koChina, mboka ya li ya zala iikeelelithi [yokoshipala] noya li taya kolola,” osho Shangula a popi ngaaka.
Okwa ti omuvu ngoka okwa li e li momukweyo naantu ye li 30 esiku ndyoka a li a yi koshipangelo shaShiwakopo. Naapangi yaali, mboka ya li taye mu panga oya li woo nayo yi itulilwa.
Aavu mboka omi-30, ya li momukweyo nomukiintu ta fekelwa ombuto yocoronavirus, oya li ya pewa uuyelele kombinga yuundjolowele, noya li natango ya pulwa ya gandje uukwatya nenge uuyelele womakwatathano nokulombwelwa ya kale yi ikalela komagumbo yo yi ilopote koshipangelo uuna yi iyadha ye na omandhindhiliko gontumba.
“Natango ota tu popi kutya omalongekidho opo ge li gokukonaakona aafaalelwa mboka taye ya pomahala guupitilo okuya moshilongo.
Aakwashigwana otaya kunkililwa ya kale ya ngungumana, yo ya dhiginine uuyogoki osho wo okutseya muule kombinga yomandhindhiliko nekeelelo lyombuto yocoronavirus,” minista gUundjolowele a popi ngaaka momukanda gwiikundaneki mOlyomakaya.
Ombuto ndjoka yoCoronavirus oyali ya tukuka mondoolopa yedhina Wuhan moChina, ondoolopa ndjoka oyo oshilandopangelo shoshitopolwa shaHubei, mesiku sho lya li lyotango lyaJanuali 2020 nokonima okwa li ya taandele niitopolwa yomoChina.
Sigo oompaka, omukalelipo gwaChina moNamibia, Zhang Yiming okwa li a popi kutya China okwa koleka aantu ye li 7 753 mboka ya kwatwa kombuto yocoronavirus muuyuni awuhe, moka natango aantu ye li 12 167 taya fekelwa okukala ye na ombuto ndjoka.
Sigo oompaka omwaalu gwaamboka ya hulitha omolwombuto ndjoka ogu li po-170, omanga ye li 130 oya pangwa. Kapu na omuNamibia, ngoka e li moshilongo nenge e li koChina, a monika ombuto ndjoka sigo oompaka. Mongashingeyi moChina omuna Aanamibia ye li lwopo-500 mboka tayi ilongo, moka ye li 35 ya kala mondoolopa yaWuhan moshitopolwa shaHubei moka omo mwa li mwa tukuka ombuto yomukithi ngoka.
