Omuve wa ninga Isai Nhinda

OSIKOLA ya tseyika nedhina Omuve Junior Secondary School yomoshitopolwa sha Hangwena ya lukululwa noya ningi Isai Nhinda Junior Secondary School.

Tate Isai Nhinda, omunangeshefa omugundjuka muumbangalantu wa Namibia, ngoka Elelo lyOsikola Omuve Junior Secondary School kumwe naavali yaanona taya sikola pOsikola ndjoka ya tokola enongelo ndika ye li lukile omunangeshefa Omugundjuka nguka Isai Nhinda, noyi kale nee hayi ithanwa Isai Nhinda Junior Secondary School.Oshituthi shElukululo lyOsikola ndjika osha li ko nee meti 2 Oktoba 2009. Kakele kaanenentu yalwe oyendji ya li ya kala pOshituthi shelukululo lyOsikola ndjika, pOshituthi shika opwa li wo pwa kala Oministeli yUuyuki me Pendukeni Iivula-Ithana, ngoka wo a egulula pambelewa Oshituthi shika nokupandula omusamane Nhinda sho a taamba ko okulukilwa Osikola ndjika yi ninge mbushe.Esiku ndjoka Isai Nhinda okwa kwata mbushe nongushu lela. E mu pe omagano geshina lyokuulika omathano. Yamwe ohaya ti kutya eshina lyokino. E li pe Omukuluntusikola tate Sackey Pohamba, ngoka e li taamba ko pehala lyosikola yawo. Tate Isai Nhinda ta gandja omagano kumbushe gOokoompiuta omilongombali nayimwe (21) noshowo egameno lyOosekuriti pOsikola mpoka. Ookuume ka tate Nhinda, ngashi Ombaanga yOtango yOpashigwana (First National Bank-FNB), noshowo Omahangano Omakwashilipaleki ga tseyika nawa, Metropolitan na Old Mutual noshowo aanangeshefa yalwe oya li wo ya yambidhidha kuume kawo Isai Nhinda naashoka ya li ye na po, opo a pe mbushe ngoka opo ta tameke okukookaya.Omagano ga gandjwa oga li gongushu yooN$90,000 lwaampoka.Tate Nhinda okwa pandula sho a pewa esimaneko li thike mpoka nokwa ti elukilo ndika okwe li taamba ko nomaako gaali nota tsikile okuyambula po mbushe ye, pa ku mu kwathela moompumbwe dhe, mpoka ta vulu.Omukuluntusikola tate Pohamba naye okwa pandula noonkondo tate Isai Nhinda sho a taamba ko eindilo lyawo okulukilwa osikola yawo. Ta pandula wo unene komagano ngoka a pe mbushe. Ta pandula ookuume ka tate Isai Nhinda sho ya kwatha tate Nhinda mokukwata mbushe. Ta pandula wo Minista Iivula-Ithana sho a egulula pambelewa oshituthi shelukululo lyosikola yawo naayehe ya li ye ya po nokutyapula pamwe oshituthi shelukululo lyosikola yawo ndjika.