Omuunganeki woFishrot okwa longifa Pupkewitzopo a dule kushakena naBernhard Esau

Johanes Stefansson omungaaneki nomweeti woFishrot kombada okwa longifa omunangeshefa umwe Omunamibia a fimanekwa nokushiivike nawa Harold Pupkewitz, opo a dule okushakena naminista mukulu weeshi noikwanghono Bernhad Esau lwopexulilo lomudo 2012, ouyelele ou wa yandjwa momhangu yopombada yaVenduka etitatu osho wa ti ngaho.

Stefansson okwa li a dengela Pupkewitz, oo a li omukulunhuwiliki wehangano leengeshefa doPupkewitz, opo a pule va ninge oshoongalele naye omanga yee pamwe novanailonga pamwe naye mehangano lokukwata eeshi lokoIceland ledina Samherji inava talela po Namibia muNovemba 2012, eeimaila odo kwa li da tumwa kuStefansson osho da holola ngaho.

Eshi Pupkewitz a itavela okuninga oshoongalele naStefansson, okwa udaneka opo a vatele Stefansson noshoongalele osho kwa li a longekida a ninge naEsau, okwe mu lombwela moimaila: “Ondi mu shi nawa [Esau] lela eedula dihapu.”
Eshi okwa li sha landulwa komukada oo Pupkewitz kwa li a tumina Esau.

momukada , oo wa shangwa momafiku 14 Novemba 2012, Pupkewitz okwa li a lombwela minista kutya okwa li a lombwelwa komushiiviveta e li moNew York opo a pule Esau a pwilikine nawa kehangano ledina Katla Seafood, olo la kalelwa po kuStefansson novanailonga pamwe naye Adalstein Helgason naIngvar Juliusson.

Pupkewitz natango okwa li a shanga kutya ehangano ola hala okutunga ofabulika kOmbaye opo li kale tali dulu okumona omauwa eeshi dohorse mackerel”.

Okwa weda po vali: Ovanhu vokoIceland eshi ndi va shi, ohava ningi nawa lela moilonga yavo notava dulu okulineekelwa.

“Oshinima eshi ngeno okwa li ndi shi kutya osha puka ngeno itandi shi pula nondi shi kutya otashi ka eta oilonga.

Eenghundafano dopaimaila nomukanda pokati kaStefansson naPupukewitz okwa li da etwa poluhaela pefimbo loihokolola yeehelo lokwiifutila mo yaTamson ‘Fitty’ Hatuikulipi komesho yomhupanguli David Munsu.

Hatuikulipi okwa lombwela omhangu kutya eenghundafana nomukanda ou okwa li edi hololelwa komhangu muJuni odula ya dja ko.

Hatuikulipi okwa ti, omapopyo oo taa ti oye e lishiivififa Stefansson novakulunhuwiliki vehangano loSamherji naEsau kae shi oshili.

Hatuikulipi okwa ti eeimaila nomukanda waPupkewitz oda ulika kutya Stefansson novanailonga pamwe naye okwa li nale ve shi Esau omanga yee ina waimina ehangano leengeshefa doSamherji. Hatuikulipi natango okwa lombwela omhupanguli kutya ekwatafano laye noSamherji okwa li ashike la tala komavatelo oo a yandja kehangano opo li dule okukundafana nokukufa ombinga momaudafano e na sha nokumona oufemba wokukwata eeshi moNamibia nomavatelo vali aye okulandifa oilongomwa yeeshi dehangano loSamharji nokuyambula ehangano leengeshefa edi.