Omuulikwa iithikamena okuuka komeho

OMUULIKWA iithikamena, mehogololo lya gwedhwapo moshikandjohogololo, Okahandja okwa ti ota pula komeho okuthikama ongo omuhogololwa.Ben Katamila okwa ti ye ota tsikile neilongekidho lye opo a hogololwe momahogololo omwedhi ta gu ya.

Nonando opena omapopyo ta ga ti, Katamila ota shi vulika a kuthwe mo momahogololo oshoka oku na iinakugwanithwa yimwe inee yi gwanithapo, mbyoka a pumbwa okwiishangitha ongo omuulikwa mehogololo. Ye okwa ti ine shi tseya shoka, na okwa ti, ashihe shoka eshi oshi li melandulathano sigo oompaka.’Onda li nda tegelelwa ndi gandje omadhina 100, ndele ngame onda gandja ogendji ge vule po, pethimbo ndi ishangitha ongo omuulikwa mo 14 ga January 2010, na kapena ngoka a galukile ndje a tye sha kombinga yaashika.’ osho a ulike.Katamila oshilyo, shoSwapo, ota thikama mehogololo ndika ongo omuulikwa iithikamena, methigathano nomuulikwa gwoSwapo, Steve Biko Boois, na Christophine Kiito Paulus gwembwinda lyoongundu, Rally for Democracy and Progress, National Unity Democratic Organisation,Republican Party,All People’s Party na United Democratic Front.Katamila okwa tokola a thikame ongo omuulikwa iithikamena nenge a manguluka konima sho a lundile elelo lyopashitopolwa lyongundu ye kutya olya gama ombinga mokuhogolola aaulikwa.’Aaleli ka ye na okuthiminikilwa aantu. Oye na okuhogololwa.’ osho a ti ngaaka momaandaha.Oonzo dha tseyithilwa nawa odha ti, Amushanga Ndjai gwoSwapo, Pendukeni Iivula-Ithana okwa londodha ,Katamila kutya ota shi vulika a kondwemo mongundu ngele ota tsikile okuthikama ongo omuulikwa a manguluka, ta thigathanapo nongundu ye.Katamila okwa ti ye oku li natango omukwaSwapo okuudha.