Omuthiya otau anye elombwelo laminista

Johannes Ndeutepo

Elelo lodoolopa yaMuthiya natango inali shuna moilonga kamusela wongudu yoIndepedent Patriots for Change (IPC) Nghipudilo Ya Shiindi.

Nande minista womayambulepo eedolopa noitopotwa yokomikunda Erastus Uutoni okwa li a yandja elombwelo opo ve shi ninge oule wodula paife.

Ngoloneya wOmuthiya Johannes Ndeutepo okwa li a tula Ya Shiindi pedu okudja muJuli odula ya dja, omanga kamusela Moses Amukoto naBeata Josef kwa li va tulwa pedu oule womafiku 30.

Ovanhu ava vatatu ova kala pedu oule weemwedi 11 molwomaliumbato inaa pitikwa vati, ashike ova kala itava futwa voo itava mono nande omauwa asha.

Eshi oshe ya konima eshi ookamusela va ninga oshoongalel shihe li paveta novakalimo vomolukanda limwe mOmuthiya momafiku 02 Juli.
Paife ngaha ookamusela ashike voSwapo hava i koyoongalele.

Momukanda wa shangwa momafiku 21 December 2023 oo kwa li wa shangelwa Ndeutepo, Uutoni okwa ti ke wete naana ngee opu na ngaa omatomeno a kola okutula Ya Shiindi pedu.

Uutoni okwa ti oshinima eshi kakwa li sha kolekwa.

“Ewiliko otali pumbwa opo li ningulule etulopedu lakamusela Ya Shiindi meendelelo olo inali yela nawa ndee tali mu futu oumauwa aye aeshe oo kwa li a kalekwa medina letulopedu laye,” Minista osho a pula ngaho.

Okudja opo, omikanda oda kala tadi lishangelwa pokati kaminista nangoloneya, omo Ndeutepo ta pula opo Ya Shiindi a tewaatewe.

‘KAPU NA EANO LA NINGWA’

Ndeutepo Etitatu okwa lombwela oThe Namibian kutya Ya Shiindi oye ashike kwa li a tulwa pedu.

“Kandi shi kutya oshike vakwao ovo vavali ihava holoka koyoongalele yewiliko. Ookamusela ava inava anifwa va ye moilonga, ashike oministili otwe i lombwela oshinima eshi,” Osho a ti ngaho.

Ndeutepo okwa ti ewilikongudu ola tokola opo li tule Ya Shindi pedu nande inali mona epitikilo okudja kuminista.

“Oministili oya fa i wete i na oshinakuwanifa shokuninga omatokolo kombinga yomaliumbato ookamusela. Ondi wete kutya paife osha ninga oshikumungu shopaveta,” Osho a ti ngaho.

Ngoloneya okwa ti okatendo komalelelo eedoolopa oka ti ngee kamusela okwa monika ondjo yomaliumbato a puka na dje mo moilonga.

“Paife minista ota ti ke wete ngee kamusela na tewaatewe molwomaliumbato a puka. Ashike pakutala kwetu nopaveta, osho kashi shi oshinakuwanifa shaye shokuninga etokolo eli,” Ndeutepo osho a ti ngaho.

Okwa ti ewilikongudu ola tokola nale kutya Ya Shiindi oku na ondjo nonghee nee nakufwe mo melelo.

“Uutoni shaye okukoleka ashike ngee onghatu ei ya kufwa oya yuka ngaa,” Ndeutepo osho a ti ngaho.

“Pamwe naminista okwa li tu na okulonga mo oshinima eshi, shaashi osha yela nawa kutya otu na omaliudo a yooloka,” Osho a ti ngaho.

Ndeutepo okwa ti okwe lixula okupopya naUutoni muApilili.

Omupopiliko wongudu yoIPC immanuel Nashinge Etitatu okwa ti Uutoni okwa pumbwa okufatulula nawa.

“Omolwashike minista e na okukala te likumbu oshilyo shaye shoSwapo osho shi li ngoloneya wOmuthiya?” Osho a ti ngaho.

Ya Shiindi Etitatu okwa ti kapu nande oumwe pokati kavo a mona ondjambi yaye nghee va tulilwe pedu voo inava kala nokwiifanwa koyoongalele.

“Oshilyo shewilikongudu otashi dulu ashike okukufwa moilonga ngee tashi tamanekelwa ile sha monika ondjo komhangu yopaveta … Ndeutepo keshi omhangu,” Osho a ti ngaho.

“Ngoloneya okwa mona nge ondjo molwomalundilo aye mwene ndee ta pe nge ehandukilo.

Kutya nee eenghono odo okwe di hanga peni oye ashike ta dulu okupopya po.”

Ya Shiindi okwa ti ongudwiliki ihai ufana oilyo ikwao koyoongalele shaashi inai anena oilonga.

“Uutoni na ninge po sha! Olye a ti kutya oilyo yewilikongudu nai kale tai ane keshe odula nande inai hoololwa i yee peenghatu dimwe mewilikongudu?

“Ndeutepo ota longifa eenghono daye nai doungoloneya, a ya fiyo opo po ta tauluka omalombwelo a minista,” Osho a ti ngaho.

Amukoto okwa ti oshinima eshi oshi li momake aUutoni ongominista a ninge etokolo liwa ile a teyaule po ewilikongudu.

“Fiyo opapa onda faula oyoongalele itatu yewilikongudu … lipula ashike ewilikongudu li na ashike okaamusela voSwapo. Opu na oinima ihapu tai ningwa konima yomivelo oko,” Osho a ti ngaho.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News