Omusita Titus Heita a fumvikwa pOnakayale

OMUSITA omukulu tatekulu Titus Aikanga Heita (88) gwomomukunda Onakayale mOmbalantu moMusati ngoka a manene oondjenda dhe ongulohi yeti 1 Spetemba 2009 sho a hakukilwa komukithi megumbo, okwa fumvikwa kengathithi lyaalilasa okuzilila mOngeleka ya Nakayale (ELCIN) mOlyomakaya ngaka ga zi ko.

Oshituthifumviko she mOngeleka moka osha ningwa mewiliko lyOmumbiishofi Omukuluntuwiliki gwOshikandjongeleki shUuninginino Omundohotola Tomas Shivute, ta yambidhidhwa kOmusita gwEgongalo lya Nakayale tate Jesaya Hanghuwo noshowo ku Amushangandjayi gwOngeleka ya ELCIN Omusita Eliakim Shaanika nayalwe wo yootate Josaphat Shanghala, Linus Dama Shimakeleni nosho tuu. Yamwe yomaanenentu ya li mpoka, ongashi Aanangeshefa nAanafaalama taya kwatelwa komeho kAanangeshefa ya tseyika nawa, tate Johannes Andjamba na tate Mauno Haindongo.Pethimbo taya gandja ondjokonona ya nakusa tatekulu Titus Heita, Omusita Josef Avia nOmusita Josaphat Shanghala, oya ti kutya nakusa Heita okwa valelwa momukunda Okalwii mOmbalantu. Sho a koko okwa ka longa kuushimba meefalama dha Gobabis, ta litha oonzi, ndhoka a niwa a kala te dhi ningile elongelokalunga, ta hunganeke nani ta ka ninga omusitagongalo esiku limwe.Okwa za ko nokwa tameke osikola yaamati pOnakayale nokuza mpoka ta tumwa nayakwawo yalwe kOseminali yokOniipa nomomumvo 1954 okwa yapulilwa Uusita moka a longo uule woomvula omilongombali nasha,odhindji dho mwaandhika okwe dhi longo megongalo lyaNakayale, omanga ina ka longa mElelo lyAawambo okuza momumvo 1968 moka a kala sigo omomumvo 1988, sho Elelo ndika lya kuthwa po kOkatokolitho 435, hoka ka eta sigo omemanguluko lya Namibia momumvo 1990.