Omusinda omutiligane nagu ze po, Kaura ta ti

PETHIMBO ta popitha oshigongi sho DTA mElyambala Okaku mOngwediva mOsoondaha , Omupresidende gwoDTA Katuutire Kaura, okwa popi euvonayi lye komusinda omutiligane inagu kuthwa po natango.

Tagu tsikile okutopola Namibia mIitopolwa iyali, shokuushimba naashoka shokuumbangalantu.Okwa ti oshinima shika inashi pumbiwa nande we moNamibia lya manguluka nomusinda omutiligane nguka ogu na okukuthwapo nokufalwa kontaululi, ano kOngamba ya Namibia na Angola.Kaura ta ti, sigo oompaka, Epangelo olya nyengwa okukutha po omusinda nguka, nonando oshigwana sha kala tashi nyenyeta kutya nagu ze po. Omusinda ogwa tulilwe po kEpangelo lyOmukolonyeki, gu kelele aniwa iimuna yomIitopolwa yaayehe, kayi nape mumwe naambyoka yokuushimba, molwashoka aniwa mbyoka oyi na omukithi nonyama yayo itayi vulu okulandithwa ngashi koEuropa hoka haku landithwa onyama yoongombe dhomuushimba.Omusamane Kaura okwa ti ondjindikila ndjoka oya gwana okukuthwa po pakupanga iimuna yomoshitopolwa shaayehe shoka noku yi kutha omukithi ngoka gwa tilika ndele tayi kala ya eluka nawa ya fa nee mbyoka yomuushimba.Kaura ta ti epangelo olya li, li na oku kwathela aanafaalama moshinima shokuhwepopaleka onkalo yiimuna moNooli opo yi kale yi na ongushu, ngaashi mbyoka yomuushimba.’Onkalo yatya ngeyi, osho ashike tayi kala yatya ngawo, sigo uunake nee? Okwa ti, ngele oDTA oya yi koshipundi, omusinda ngoka ota gu zipo moompadhi oontalala.Omusamane Kaura ota gandja uusama kEpangelo lyOswapo sho lya tula po omulandu gwokunkondopaleka aniwa aaluudhe, muunafaalama, muunangeshefa nosho tuu, ihe omulandu nguka ogu li po ashike gwokuyambapaleka oofamili dhontumba, ooministeli, aanambelewa aakuluntu mEpangelo nosho tuu, omanga oshigwana oshindji shopevi, kashi na mo uuwanawa washa momulandu nguka.