ONGUNDU yoSwapo oya gandja omushangwa uvaneko gwayo gwomahogololo gonuumvo moVenduka mOlyomakaya ngaka ga yi.
Omushangwa nguka ogu li kohi yoshipalanyolo ekondjelo lyemanguluko pamahupilo noshowo uuyamba kwaayehe.Momushangwa nguka oSwapo ota yi uvaneke oku longa opo yi kalekepo onkalo ombwanawa kaanangeshefa yopaumwene opo ya vule okuhumithaa komeho omahupilo.Ota yi ti,ota yi longo oku sa oshimpwiyu kutya omahangano gopapangelo ota ga longo nawa opo ga humithe komeho ekoko momahupilo goshilongo.Ongundu oya ti ota yi longo no ku humitha komeho elongelo kumwe pokati kepangelo noshimpungu shopaumwene opo oshilongo shi ye komeho. Ota yi tsikile woo noku kumika oshigwana opo shi ye moshimpungu shoongeshefa, dhopokati, noshowo oongeshefa dhoku hambula opo iilongomwa yomoshilongo yi vule okuningwa iinima yapwa okulongwa okuyeleka naasho ha yi tumwa mo poompito odhindji yili molupe lwopetameko, unene ngaashi iikwamina, oohi nonyama.Kakele komahupilo omanifesto otayi ti wo ongundu oya hala okutsikila noku opaleka iikwamatungo, oondjila, iikwamalusheno, iikwangodhi,nosho tuu.Momushangwa oSwapo ota yi uvaneke woo kutya okweetapo oompito dhiilonga kaantu yomoshilongo nasho oshili natango elalakano lya yo enene.Onkene okukokeka omahupilo oshi li oshinima sha pumbiwa opo pu ye iilonga. Ota yi ti ota yi kumike aapunguli opo ya tule iimaliwa yawo muunamapya, moomina, moohi noshowo memuno lyoohi. Ota yi kumike woo aapunguli ya pungule miikwafabulika, momapashiono, moshikondo shiimaliwa, momauyelele nosho momakwatathano gopangodhi.Ngaka ogo gamwe gomauvaneko gongundu ta yi pangele ngoka ga nyanyangidhwa momanifesto ndjoka ya gandjwa molyomakaya moVenduka.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
