Omupolisi ta konaakonwa medhipago lya Salomo

OPOLISI moHangwena ota yi konaakona oshipotha shi na sha nedhipago lyokamati koomvula 23 komomukunda Omundudu mOukwanyama hoka taku tiwa kutya okayahwa nondjembo kOmupolisi ongulohi yEtitano lya zi ko.

Komanda gwOpolisi mOshitopolwa sha Hangwena, kOmufala gwOpolisi Armas Shivute, kepulo, okwa koleke oshiningwanima shika.Komufala Shivute ta ti kutya oshoshili pomukunda ngoka Omundudu popepi nEndola mOshitopolwa sha Hangwena opwa yahwa omumati gwoomvula 23 kOmupolisi, konima sho meme gumwe e ya a lopote kOpolisi ya Mungwelume kutya oku na iimaliwa ye ya yakwa po komonamati gumwe nakuume ke. Komufala Shivute ta ti, Opolisi oya endelele nokuya kOmundudu hoka yi ka ninge omakonaakono. Shivute ta ti Opolisi sho ye ya mpoka oya ulikilwa uumatyona mboka uyali Michael Hafeni na Salomo Mufeti noye ya kwata po nokutameka ngeno taye ya pulaapula kombinga yeyakopo lyoshimaliwa shoka. Mokuninga omakonaakono, Komufala Shivute ota ti kutya okwa lombwelwa kutya Salomo, okwa fadhuka po Opolisi. Opolisi tayi umbu pombanda a galuke,ashike Salomo aniwa okwa tsikile ashike ta matuka po, nOpolisi oye mu yaha kolutu nokwa si.Naku yaha Salomo, ano Omupolisi ngoka, okwa gandja ehokololo lye kOpolisi nkene sha enda. Hafeni, ngoka taku tiwa kutya oye a yaka po oshimaliwa sha yina, nokuya nasho ku kuume ke Salomo, okwa kwatwa po kOpolisi nokwa holoka mOmpangu ya Mangestrata pOmungwelume shi na sha neyako lyoshimaliwa shoka.Omumwayina gwa nakusa Salomo,ano meme Julia Mufeti, ota gandja uusama uunene kOpolisi shi na sha nedhipago lya mumwayina Salomo kOpolisi. Meme Julia ta ti, nakusa Salomo ye mwene ke na mo sha meyako lyoshimaliwa tashi popiwa, ashike, molwashoka Hafeni okwa li kuume ke, oshimaliwa otashi vulika ye shilya shili ayehe.Meme Julia ta ti Opolisi nayi konaakone oshinima shika nawa nomuule washo. Ta ti pauyelele mboka wu li po Salomo kali ta fadhuka po. Oshinima oshikwaswo, Opolisi ndjoka ya yaha Salomo, inayi umba pombanda nande tango oya thikila ashike tayi mu umbu noku mu yaha kolutu nokugwila po.Julia ta ti Salomo sho a yahwa ngawo ina sa pethimbo ndyoka,okwa kala e na omwenyo, ashike nonando oshigwana sha li mpoka sha kala tashi pula Opolisi yi mu fale kOshipangelo nenge yi ethe a falwe koshipangelo kwaamboka ya li mpoka ye na iihauto, kaya li ya hala shi ningwe. Julia ta ti wo kutya Opolisi ndjoka ya li mpoka noya yaha Salomo, oya li ya kelela aakwashigwana mboka ya li mpoka, ya dhenge oongodhi, ya lopote onkalo ndjoka ya li mpoka, nenge okutseyithila yaandja Salomo kutya okwa yahwa.’Opolisi oya li ya kelela kehe gulwe ali mpoka a dhenge ongodhi, noya kala ya mwena inayi hala okufala Salomo kOshipangelo, nonande a li ta fudha notinyenge kashona. Oye mu etha sigo ta si. Sho Opolisi ya yi kOmungwelume na Hafeni, nayalwe, opo ya thigi omudhimba gwa Salomo mpoka noku ya yi gu kuthe po konima sho ya galuka, ano ya adha nee a sa nale,’ meme Julia ta hokolola nokutsikila ko kutya oshigwana shoka sha li mpoka oshe shi mona mo sha yela kutya Aapolisi mboka ye yile mpoka, unene tuu ngoka a yaha nakusa Salomo, okwa li ta monika a nwa na osha li sha yela kutya kali e shi sho ta ningi. ‘Opolisi nayi konaakone nawa oshinima sheyaho neso lya Salomo. Opolisi ndjoka ye mu yaha, oya longa nuuhethi lela unene,’ meme Julia ta ti ngawo.Komufala Shivute, ngoka a ti kutya oshiningwanima shika otashi konaakonwa, okwa ti kutya ye kapu na ngoka e mu lopotela sigo opo mpaka kutya Omupolisi ngoka ta fekelwa a yaha Salomo, okwa li kohi yondhungo sho sha ningwa. Ta ti Aapolisi sho ya lopotelwa oshinima shika,oya adhika kOsasiona kOmungwelume na oko ya zi yuukilila kOmundudu, na ke shi naanaa kutya opolisi ya zi kOsasiona oya li ya pita ishewe poondingosho yi kanwe. Nande ongawo, okwa ti ekonaakono lyOpolisi oli li metifa.