Omupolisi a tamanekwa molwehepeko

OMUNAMBELEWA gwopolisi yoshilando sha Venduka okwa kwatwa molwa okweehameka omukiintu gumwe a longitha oshifikithi shoongombe.

Oshiningwanima shika ota ku tiwa osha ningilwe kuyele omwedhi nguka. Konstabel, Toivo Shangolo[25] okwa kwatelwe nokuhokololithwa omaandaha omolwa oshinima shika sha ningilwe omasiku omulongo ga pitipo. Oshinima shoka ota ku hokololwa sha ningilwa molukanda lwa Havana, moKatutura. Ota ku tiwa omweeti gwoshipotha, Hilja Nekolo[29] opamwe naakalimo yomo Havana oya li taya nyenyeta kombinga yiikuni, nopolisi yoshilando oya li ya ithanwa opo yi potokonone omukundu ngoka. Ota ku tiwa Shangolo aniwa okwa kuthako iikuni, na Nekolo aniwa okwe ke yi pula ko kopolisi. Okwa li woo a pula opo, Shangolo aye pamwe naye kosasiona yopolisi ndele nguka aniwa okwa tindi oku shi ninga. Ye aniwa okwa ka tameka ta fike omukiintu ngoka nokashina kolusheno hoka haka longithwa oku fika iimuna opo yi inyenge uuna ta yi tuntilwa nenge ta yi londekwa mosheenditho. Ehangano lyuuthemba womuntu olya ti opolisi aniwa oya katuka ashike onkatu konima sho ehangano ndyoka lya yimo moshinima shoka.Aapolisi ayehe kutya oomboka yoshilando nenge oomboka yoshilongo ka ye na uuthemba oku hepeka nando omuntu kutya onomatompelo genipo.Onkene NamRights okwa indile omukuluntu gwopolisi ya Venduka, Abraham Kanime opo a ninge ekonakono kombinga yomalundilo taga ningilwa Shangolo naanambelewa yalwe. Kanime oku li mefudho sigo oompaka. Sho a pulwa omunambelewa omukuluntu mopolisi yoshilando, Senior Superintendent, Gerry Shikesho okwa ti oshinima shoka oku shishi. Okwa tsikile a ti Shangolo ina tulwa pevi, oshoka kapena natango uuyelele auhe kombinga yoshinima shoka. Ndele Shikesho okwa londodha aanambelewa yopolisi kutya kapena siku iilonga mbyoka ta yi kiidhidhimikilwa nando. Omweeti gwiipotha mohofa,Emmencia Hinda okwa kondjitha opo Shangolo kaa pewe iifutilemo mondholongo oshoka otashi vulika a ka piyagane noombangi dhepangelo. Iihokolola mbyoka oya undulilwa sigo oko masiku 26 ga January nuumvo.