Omupangi Lidia a si sho a pumwa kohauto

OMUPANGI a longa ethimbo ele lela moshipangelo shEpangelo sha Shakati, Lidia Nena Elago (54) okwa si eso lyombaadhilila nolinyanyaleka komatango gOlyomakaya ngaka ga zi ko sho a pumwa kohauto mOneshila mondjila onene ya Ngwediva nOshakati.

Otaku tiwa kutya ohauto ndjoka ye mu dhipaga oya adhika tayi ithigi po noonkwawo dhimwe mondjila onene yopokati kOngwediva nOshakati. Komanda gwOpolisi moshitopolwa sha Shana Komufala gwOpolisi, Ndahangwapo Kashihakumwa, ota ti nakusa, Lidia okwa adhika a thikama komunkulo gwondjila ndjoka, a tegelela iihauto mbyoka tayi ithigi po, yi pite po ye a taaguluke nawa ondjila ndjoka a ye kegumbo lye lyomOneshila ndyoka li li ashike popepi naampoka a puminwa kohauto ndjoka. Manga nee e li aniwa komunkulo gwondjila hoka, omuhingi gwayimwe yomiihauto mbyoka tayi ithigi po, okwa kanitha ewiliko lyosheenditho she no sha nukile komunkulo gwondjila hoka kwa li kwa thikama Lidia noshe mu pitula ko. Komufala Kashihakumwa ota ti kutya ohauto ontshona yokahima yoGolfa, otashi vulika ya li tayi endelele noonkondo, oshoka moku mu pitula po ngawo, oya nyanyagula olutu lwe nayi. Nakusa Seesitela Lidia Elago, okwa thiga ko oyana yatano, aakadhona yatatu naamati yaali noshowo uutekulu uukadhona uyali. Ota fumvikwa ngula mOlyomakaya pegongalo lyawo lya Mpundja. Aakwanezimo oya lombwele The Namibian kutya, okwa li e na okufumvikwa ta zilile megongalo lyawo lya Mpundja moka, ashike nee molwashoka ngula mOlyomakaya mOngeleka ya Mpundja omu na aniwa oohango odhindji, oya tokola Elongelofumviko lye lyi ningilwe pegumbo lyawo pOshatumba mOmpundja moka nokuza mpoka taya yi nee nawa komawendo ga Mpundja hoka ta ka langekwa megumbo lye lya hugunina.Oshituthidhimbuluko she otashi ningwa komatango gonena pegumbo lyawo pOshatumba mOmpundja, omanga shimwe sha ningilwe ohela moshipangelo shepangelo sha Shakati. Nakusa Lidia okwa kala omupangi mOshipangelo shEpangelo sha Shakati ethimbo ele noku shiwike a li omupangi omunandjungu miilonga, omusimaneki, omunambili nomuyakuli gwaayehe. Oshifo shetu otashi gandja omahekeleko koonakuthigwapo atuheni.