Omupangi a dhipagwa pegumbo lyaapangi moVenduka

ONGUNDU onene yaaniilonga yuundjolowele oya li ya gongala pegumbo limwe lyaapangi poshipangelo shopokati shaVenduka moSoondaha konima sho ya uvu onkundana kombinga yedhipago lyomuniilonga omukwawo.

Omuniilonga miilonga yomashina gokukonakona ngaashi ngoka gonte ya X, Hileni Enkono okwa adhika a sa mondunda ye yokulala metungo lya D lyomomagumbo gaaniilonga yuundjolowele ongula yoSoondaha.Onkundana ndjika oya endelele kutya ngaaka nOministeli yUundjolowele omundohotola Richard Kamwi na ye okwe ya pehala mpoka noku gandja omahekeleko kaakwanezimo lya Hileni Enkono.Ota ku tiwa aniwa omulumentu gwa Enkono ngoka aniwa a za koSwakopmund okwa fala okanona kawo komvula yimwe kondunda ya kuume ka Enkono ndjoka woo yili pondondo yimwe nenge povloera yimwe.Aniwa omulumentu nguka okwa gandja woo iipatululo yondunda ya Enkono ku kuume ka Enkono omanga inaa thiga po etungo potundi ontiheyali yongula. Olutu lwa Enkono olwa li lwa monika konima ashike,sho omulumentu nguka a thigipo ehala, naaleli nenge aawiliki oya li ya tseyithilwa shoka sha ningwapo.Pahokololo lyaamboka ya li po ota ya ti omuligu gwa Enkono ogwa tetwa.Opolisi oya ti omulumentu nguka ta fekelwa okwa kwatwa konima sho aakwanezimo lye ya tseyithile opolisi kutya ye oku li peni.Pauyelele mboka wa gandjwa kaanezimo lya Enkono mboka ya li mpoka ota u ti aagundjuka mbaka oya kala mohole yuule woomvula dhivule pu ne.