Omunasikola a tulwa miipandeko sho a dhipaga omwana

Malakia Simaho

Omukadhona gwomimvo 18 ngoka e li mondondo 11 posikola tayi adhika momudhingoloko gwaElim moshitopolwa shaMusati okwa tulwa miipandeko mEtine lya zi ko sho taku hokololwa kutya okwa dhipaga omwana, ano ohanona ndjoka opo a mono.

Omukwatakanithi gomakonakono giimbuluma moshitopolwa shaMusati, Malakia Simaho okwa popi kutya kakadhona ngoka okwa li a pulumutha okanonamati momuhandjo gwosikola, mEtine.

“Okwa mono okamati nokwe ka hwele mokana oombapila dhokokandjugo nolwanimwa okwa mangele okanona hoka mokambindja nokutula omudhimba gwohanona meyemele.

Omufekelwa okwa holeke omudhimba gwohanona mosikopa yomondunda ye momuhandjo, ngoka lwanima gwi itsuwika kaanasikola yalwe sho ya landula ombinzi ya ndonda okuza kokaiyogelo,” osho Simaho a popi ngaaka.

Shoka oshe eta omufekelwa a tulwe miipandeko.

Omufekelwa okwa holoka mompangu yaMangestrata gwOutapi, mEtitano.

Iiwike iyali ya piti, onzonkundaneki ndjika okwa li ya kundaneke kombinga ya komanda ta kwathele mopolisi yaKavango Uuzilo, omupevikomufala Eino Nambahu ngoka a koleke oshiningwanima shomukiintu ngoka a tulwa miipandeko sho a pulumutha nokwe ekelahi ohanona ye.

Okwa popi kutya oshiningwanima shoka osha ningwa momasiku 8 Mei lwopotundi 12h00, nomukiintu ngoka okwa patululilwa oshipotha shokweekelahi okanona mopolisi yoshitaasi shaRundu.

“Otaku hokololwa kutya omufekelwa okwa pulumutha okanona mondunda ye nolwanima okwe ke keekelehi melambo lyokandjugo. Okanona hoka okwa li ka dhimbululwa komukwashigwana gulwe ngoka kwa li a hala okulongitha okandjugo hoka nokwa li u uvu okanona taka lili,” osho Nambahu a popi ngaaka.

Okanona hoka okwa li ka hupithwa sho ka kuthwa mo melambo lyokandjugo nomwenyo notaku hokololwa taka mono uuhaku moshipangelo shaRundu metonatelo lya yina.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News