Ovaleli vamwe vehangano lovanailonga vomeemina ledina Mineworkers Union of Namibia (MUN) ova ninga omapulo kombinga yoshimaliwa shi fike lwopeemiliyona mbali osho kwa li sha futwa komunashipundi wehangano ledina olo tuu olo Johannes Ndeutepo.
Oshinima eshi oshe ya konima eshi kwa didilikwa kutya opa fa pu na oupyakadi shaashi Ndeutepo oha lopota kehangano olo tuu olo le mu kuta molwoilonga yopaumwene.
Ehangano eli la kwatafana noSwapo okwa li lili meenghundana oshivike sha dja ko eshi omuhona walo mupe a shiivifa etulopedu moilonga la pelesidente wehangano mukulu Ismael Kasuto nomupedu pelesidente mukulu Desley Samsob, oshinima oshoovanhu vamwe tava ti kashi li paveta.
Paife ope ya omalipulo nghee ovahona vehangano eli va kala nokutonatela oimaliwa yehangano loikwamina eli lakula moshilongo, shi fike peemiliyona N$750.
Oshimaliwa shimwe osho sha monika osho sho sha kwatela mo omunashipundi wehangano ledina Namibia Mineworkers Investments Holdings Ndeutapo noilonga yaye nomatuvikilo opambaanga nehangano ledina Namibia Miners Investment Trust (Namit).
Namit ehangano eli la tota ehangano lovanailonga womeemina ledina Namibia Mineworkers Investment Holdings.
Omikanda oda ulika kutya Ndeutapo okwa li a kutwa koMUN opo a kale ta yandje omayakulo okwoongela omauyelele kehangano.
Okwa li ha futwa koNamit, oyo kwa li ya totwa opo i yambidide oilyo yehangano loMineworkers Union of Namibia (MUN) naavo va tala mehangano omo.
Ndeutepo okwa koleka okuyandja omayakulo aye paumwe ashike okwe likala kutya ina ninga sha nande sha puka.
Omikanda odo da monika koThe Namibian oda ulika kutya Ndeutepo okwa li a futwa luheyali oshimaliwa shi fike peemiliyona mbali pokati komafiku 30 Juni 2020 naDesemba 2020.
Omavalulo aa okwa eta omalipulo koilyo imwe yehangano, vamwe ova ti nokuli omayakulo aye inaa pumbiwa.
Omunhu umwe eli popepi noshikondo shoshimaliwa shehangano okwa pula kutya omolwashike ehangano li na okufuta Ndeutepo, shaashi ehangano ohali mono oshimaliwa shi fike pomiliyona oshinghwanyu hetatu ile omiliyona oshinghwanyu hamano keshe komwedi okudja moshimaliwa shoukwashilyo.
Omunhu ou okwa pula kutya omolwashike Ndeutepo kwa li ta longo oilonga yopaumwene nehangano olo halo pota kulo.
Omunhu ou ta shemununa oshinima eshi okwa hala okuuda kutya otendela ei okwa li ya shiivifwa naini, novanhu ovo kwa li va hoololwa nongee oimaliwa ei ya futwa okwa li ngaa ya tokolwa kelelo olo li na okushininga mehangano.
Odjo imwe oyo tai yambidida Ndeutepo oya ti omunangeshefa ou okwa li e lihanga ta kondjele melelo lehangano.
OMANYAMUKULO A NDEUTAPO
Ndeutepo okwa lombwela oThe Namibian Olomakaya kutya oimaliwa aishe oyo a futwa okwa li i li peeveta dehangano.
“Omafutilo aeshe oo kwa li nda ninga, kutya nee opefimbo opo nda li, omuwiliki ile opefimbo opo kwa li ndihe shi omuwiliki, aeshe okwa li a ningwa she likolelela komilandu dehangano ile oilonga oyo hai longwa kwaame,” Osho a ti ngaho.
“Nghi na fiku nda kufile ombinga motendela yomayakulo ange ehangano nande olimwe. Ohandi yandje ashike oipumbiwa yange kwaavo va hala omayakulo ange ndee ngee ove i tambula ko, handi i komesho noilonga yange ngaashi sha pumbiwa.
“Kombinga yomakondjifafano, otashi dulika pa kale pu na omalimbililo molwokuhaudako. Tete, ihandi longo oilonga yopaumwene mehangano olo handi wilike shaashi onda teelelwa ndi yandje omayakulo ange komahangano oo omanga handi futwa efimbo lange olo ngaashi eemhango nomilandu dehangano tadi ti.” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
