Omunangeshefa Punyu a hulitha

OMUNANGESHEFA a tseyika nawa gwomomukunda Oniihandi mOndonga mOshitopolwa sha Shikoto, mwene goositola dhoPunyu tate Jairus Shikale, a tseyika nawa nedhina Punyu, okwa manene oondjenda dhe mOshipangelo sha Nandjokwe ongulohi yeti 29 Oktoba 2009 konima yuuwehame nomepipi lyomimvo 59 lwaampoka.

Nakusa tate Shikale,ngoka e li omvalele ya Tilyasa mOngandjera, mwene kwali gwOongeshefa dha Punyu, tadhi adhika unene mIitopolwa ngashi mOshana, mOshikoto, mOhangwena noshowo mOmusati. Okwa kala wo nOhotela onene pegumbo lye pOniihandi moka mwa kala wo Okasino, omanga a kala wo nOshikokota shomamanya kOshomeya. Okwa kala wo noongalashe dhOmahooli pomahala ogendji monooli.Ehangano lyAanangeshefa moNamibia, okupitila mOmunambelewa Omukuluntupitithi gwalyo, tate Tarah Shaanika, olya gandja etumwalaka lyalyo kOmuselekadhi meme, Abia Shikale, kaanona nokOfamili ayihe ya nakusa Shikale. Taya ti kutya Namibia okwa kanitha ependa muunangeshefa. Etumwalaka tali tsikile ko tali ti kutya nakusa Shikale, kali ashike omunangeshefa, ihe okwa li wo omukwatheli gwaayehe mboka ya li moompumbwe dhontumba nodhongandi. Akwathela wo aanangeshefa mboka aashona mokuthikama po nenge moompumbwe dhawo kwali dhoshimaliwa nosho tuu. ‘ Otatu lili ependa,lya li tali tungu oshilongo noku shi yambula po paunangeshefa nosho tuu. Okwa yi nziya, pethimbo a li lela mepipi nopethimbo lyokutsikila neyambulopo lyoshilongo noshigwana pamona,’ Ehangano lyAanangeshefa ta li ti ngawo nokutsikila ko tali gandja omahekeleko omanene koonakuthigwa po, unene komukulukadhi gwe meme Abia, aanona nokezimo alihe lya nakusa tate Shikale, omolu ekanitho enene ndika.Nakusa Shikale okwa thiga ko nee omukulukadhi gwe, meme Abia Shikale noshowo aanona yawo yane, naatekulu. Omalongekidho gEfumviko oge li metifa nOshifo shetu otashi gandja omahekeleko koonakuthigwapo atuheni.