Omunamaithano Dengeinge a fumvikwa mOlyomakaya

OMUSITA gwOngeleka ya ELCIN (a li moshipundi shevululuko, Hendrik Ndeulikilwa ya Timoteus Ndengeinge,ngoka a mana oondjenda dhe meti: 17 gomwedhi nguka,okwa fumvikwa mOlyomakaya ga zi ko pOhakweenyanga okuzilila mOngeleka ya ELCIN mOngwediva.

Nakusa Ndengeinge okwa li e na oomvula 82. Aantu mboka ya li poshituthifimviko she otaku tengenekwa ya li ye li lwopamayuvi gaali.
Aalilasa ayehe mboka ya mono ompito yokutyasha, oya tanga Dengeinge ong’omunandjungu moshilongatumo, shoka a longa uule woomvula omilongo ne nahamano sigo tayi moshipundi shevululuko. Ondjokonoma ya tatekulu Dengeinge oya holola kutya okwa li a valelwa momukunda Omanyoshe mEndola omanga ye naakuluntu ye inaya tembukila mOngwediva moka aka kala onkalamwenyo ye ayihe sigo opeso lye.
Kakele kiilonga yuusitagongalo, Dengeinge okwa longa ongo omulongisikola, noshowo omunafaalama omanga inaya moshilonga sheuvitho lyEvaangeli.
Omubiishofi e li moshipundi shevululuko Appolus Kaulinge okwi ithana Dengeinge ‘omunamamoniko omawanawa’ nosho wo ‘omagano omawanawa kOngeleki nokuNamibia ga za ku Kalunga.’
Ethimbo lyuule woomvula omilongo ne nahamano dhoka a kala mUusitagongalo, tatekulu Dengeinge okwa longa wo ong’ Omutumwa gwEvaangeli momagongalo moondolopa dha yooloka ngaashi moTsumeb, kOlange, nokwa dhana onkandangala mokutota egongalo lyaHalushu.
Kuku Aili Dengenge okwa ti omusamane gwe okwa li omutekuli, omuhungimwenyo,nomunandjungu mukehe shoka ta longo.
‘Dengeinge gwange okwali omunambili, omutekuli gwaayehe shi thike pamwe nomupopi newi yombili. Okwa tekulila yoo egumbo lye uukwaKalunga mokudhiginina okuninga owaandaha esiku kehe. Okwa longa woo nuudhiginini mOshilongatumo shuusita megumbo nomegongalo. Otandi pandula Kalunga sho a pele ndje omwiidhidhimiki nomunahole tate Dengeinge gwandje,’ Kuku Aili ta popi ngaaka.
Pethimbo Ongerki okwaEvangeli pa Luther yali ya pewa ompito opo yi gandje ewi lyayo ndjoka lyali lye etwa kuHamushanga gwOngerki Omusita Eliakim Shaanika, okwa hokolola tatekulu Dengeinge omunamamoniko gatsa ngoka a eta omalunduluko kehe mpoka ali a tumwa.
‘Tatekulu Dengeinge okwali e eta elunduluko enene mEgongalo lyetu na unene kehe mpoka ali a tumwa a ka uvithe evaangeli. Oku uvitha nondjungu elaka lyu ukilila. Onda hala woo aasita aakwetu tu kutheko oshiholelwa shoku uvitha ohapu yeehanganitho ethimbo ndika Ongerki ya topolwa kopolotika,’ Omusita Shaanika ta popi.
Omupresidente gwaNamibia Hifikepunye Pohamba naye woo okwa li a tumu etumwalaka lyehekeleko kAakwaDengeinge negongalo alihe djoka lya leshwa ku Ngoloneya gwaShana Klemens Kashuupulwa.
Otaku hokololwa woo kutya Omusita Dengeinge okwali woo a hupu miiponga iinene ngaashi moshiponokela shomboma yu umbwa megumbo lye ketanga lyomukolonyeki pethimbo lyiita yEkondjelomnguluko noshowo moshiponga oshinene shohauto mondjila kwali tayi pamwe nayalwe kOkavango koshigongi shongerki.
Nando mwa monikile iiponga, inamu sa nando omweendi pamwe naye gumwe.Ongundulwiimbo Teimbi Itezimbuka naandoka yegongalo lya Ntananga oyali ya mwenyeke oshituthifumbiko shika. Eyapulo lyomudhimba okwali lya ningwa kOmubiishofi Johannes Sindano. Tatekulu Dengeinge okwa thiga ko oyana yahetatu nomuselekadhi kuku Aili Dengeinge.