Omunailonga woNamPost a vaka eemiliyona N$8

Omunailonga mukulu wehangano ledina Namibia Post (NamPost) ota tamanekelwa oumbudi woshimaliwa shi fike peemiliyona N$8 odo da vakwa mehangano.

Omikanda odo da yandjwa komhangu yopombada mOvenduka oda ti, NamPost okwa ka nifa oshimaliwa shi fike peemiliyona N$4,9 medina loumbudi ou.

Omhangu okwa li ya lombwelwa ngaha koshi yokatendo kokukelela oimbuluma ya longekidwa kutya NamPost okwa yongola kutya oshimaliwa shi fike peemiliyona N$8 okwa li sha kufwa kombaanga yaye sha yuka kombaanga yaUeriuka Vindana, oo kwa li hava tele koshikondo shomavalulo oshimaliwa shehangano.

Oshimaliwa shi fike peemiliyona N$3,1 okwa li sha hangika kombaanga yaVindini nokwa li sha shunifwa kombaanga yaNamPost muKotoba odula ya dja ko.

Momukanda oo kwa li wa yandjwa komhangu, omutamanekindjai Martha Imalwa okwa ti Vindina oye kwa li a tumina oimaliwa oyo kehangano lomakwashilipaleko omafudiko ledina Hollard sha dja kombaanga yomatuvikilo yaNampost.

Okwa ti omakonakona ombaanga oyo i li kedina laVindina okwa ulika kutya kombaanga yaye okwa li kwa tuminwa omwaalu woimaliwa ihapu oikando ya yooloka okudja muApilili fiyo omuKotomba odula ya dja ko.

MuApilili odula yandja ko, oshimaliwa shi fike pomiliyona imwe oshinghwanyu hamano sha shangwa ‘NAMPOST’ okwa li sha tuminwa kombaanga yaye, Imalwa osho a ti ngaho.

Natango oshimaliwa shi fike pomiliyona imwe oshinghwanyu imwe natango sha shangwa ‘NAMPOST’ okwa li sha tuminwa kombaanga yaye muMei 20203.

Oimaliwa aishe oyo kwa li a tunima kombaanga yaye okwa li i na okukala ya tuminwa kehangano ledina Hollard.
Momafiku 18 Kotoba odula ya dja ko, natango oshimaliwa shi fike peemiliyona N$3,1 okwa li sha tumwa okudja kombaanga yaNamPost sha yuka kombaanga yaVindana.

Omikanda domhangu oda ti, oimaliwa ei okwa li ya tumwa kuVindina ashike kakwa li nande ya talululwa komuwiliki waye.

Momafiku 05 Juli odula ya dja ko, Vindina okwa li a tuma oshimaliwa shi fike poN$50 000 sha shangwa ‘Old Mutual Unit Trust’.
Oshimaliwa eshi shi li kombaanga ei yaOld Mutual Namibia osho ashike shaVindina ashike Imalwa okwa yandja elombwelo okudja komhangu opo iha kufwe ko nande.

Vindina okwa li a xulifa po oilonga koNamPost meendelelo momafiku 19 Kotoba odula ya dja ko, omanga omakonakono kwa li e li metifa.

Momukanda waye ewokufiya po oilonga, okwa ti okwa kala noupyakadi woukolele oule weedula nhee da pita, ndee medina loshinima eshi okwa kala nokuninga omapuko koilonga, mwa kwatelwa okushanga oinima ya puka, omatokolo a puka nounghundi wokulongekida oinima, Imalwa osho a ti ngaho momukanda oo a yandja komhangu.

Imalwa natango okwa ti omakonakono okwa ulika kutya konima omwaalu woimaliwa ihapu oo kwa li wa tuminwa kombaanga yaVindina muApilili naMei odula ya dja ko, oimaliwa oyo ya li mombaanga yaye okwa li ya longifwa, ndee ta kushaala ashike oshimaliwa shi fike poN$1 138 momafiku 12 Septemba odula ya dja ko.

Okwa ti oumbangi ou u li po otau ulike kutya opu na omatomeno a wana okutya Vindana okwa vaka oshimaliwa shi fike peemiliyona N$8 shaNamPost oule wefimbo lihe shiivike.

Imalwa okwa ti natango Vindana okwa li ta yandje omauyelele a puka koNamPost kutya okwa li ta tumine oshimaliwa kehangano ledina Hollard okudja kombaanga yaNamPost, omanga oukwashili oyou kutya oimaliwa okwa li tei tumine kombaanga yaye yopaumwene.

Oimaliwa oyo i li kombaanga yaye yomatuvikilo naOld Mutual oya dja moimaliwa oyo kwa li a tumina kombaanga yaye moumbudi, Imalwa osho a ti ngaho.

Okwa ti natango opu na omatomeno a wana taa ulike kutya oshimaliwa shi fike poN$50 000 osho Vindina a tuvikila naOld Mutual, okwa li oshimaliwa sha vakwa, shoumbudi nokashina kutya osha dja peni.